ऊर्जा खबर
.jpg){kind=spacer}
काठमाडौं । नेपाल विद्युत प्राधिकरणले १३२ केभी चन्द्रपुर–सुकदेवचौक प्रसारण लाइन निर्माण गर्ने भएको छ । प्राधिकरणले २०० मेगावाट विद्युत प्रवाह गर्न ३६ किलोमिटर लामो डबल सर्किट प्रसारण लाइन निर्माण गर्न लागेको हो ।
मधेश प्रदेश अन्तर्गत रौतहट जिल्लाको चन्द्रपुर नगरपालिकामा रहेको चन्दुनिगाहपुर सबस्टेसनदेखि सोही जिल्लाको यमुनामाई गाउँपालिका–४, सरुअठामा प्रस्तावित सरुअठा सबस्टेसनसम्म लाइन निर्माण गर्न लागेको प्राधिकरणले जनाएको छ । प्राधिकरणले प्रसारण लाइन निर्माण गर्न विद्युत विकास विभागमा आवेदन दिएको छ ।
विभागले लाइन निर्माण तथा सञ्चालन गर्दा पर्न सक्ने प्रतिकुल असरबारे सरोकारवालासँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र राय/सुझाव पेश गर्न पनि आग्रह गरेको छ ।
३६ किलोमिटर लामो लाइनमा ११७ वटा पोल खडा गरिनेछ । टावरहरूको उचाई अधिकतम ४२.५३ मिटरसम्म रहनेछ भने टावरहरूबीचको दूरी १२६.७५ मिटरदेखि ३६५.२३ मिटरसम्म हुने अध्ययनले देखाएको छ ।
आयोजनाको लागि कुल ६८.६४ हेक्टर जग्गा आवश्यक पर्नेछ । प्रसारण लाइन निर्माणको काम ३ वर्ष भित्र सम्पन्न गर्ने लक्ष्य राखेको छ । लाइन निर्माण तथा सञ्चालन गर्दा भू–क्षय, बाढी, वायु प्रदुषण आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिनेछ ।
