खारे खाेलाकाे विद्युत प्रवाह हुने १३२ केभी लाइन दुई वर्षमा सम्पन्न गर्ने लक्ष्य

काठमाडौं । कन्सोर्सियम पावर डेभलपर्स प्रालिले ९ किलोमिटर लामो १३२ केभी प्रसारण लाइन दुई वर्षमा सम्पन्न गर्ने लक्ष्य राखेको छ । कम्पनीले दोलखा जिल्लाको गौरीशंकर गाउँपालिकामा निर्माणाधीन खारे खोला जलविद्युत आयोजनाको स्वीचयार्डदेखि नेपाल विद्युत प्राधिकरणको सिंगटी सबस्टेसनसम्मको लाइन २०८२ असारभित्र सम्पन्न गर्ने लक्ष्य राखेकाे हो ।

खारे खोलाको २४.१ मेगावाट विद्युत राष्ट्रिय प्रसारण प्रणालीमा जोड्न निर्माण गर्न लागिएको प्रसारण लाइनको अनुमति दिने प्रक्रिया अन्तिम चरणमा पुगेको विद्युत विद्युत विकास विभागले जनाएको छ ।

विभागका अनुसार आयोजना निर्माण तथा सञ्चालन गर्दा पर्ने सक्ने प्रतिकुल असरको बारेमा आयोजना प्रभावित स्थानीयसँग राय/सुझाव मागिएको छ । स्थानीयले राय/सुझाव सूचना प्रकाशित भएको ३५ दिनभित्र कम्पनी वा विभागका कार्यालयमा प्राप्त हुने गरी पठाउनु पर्नेछ ।

९ किलोमिटर लामो सिंगल सर्किट लाइनमा ३२ वटा टावर  जडान गरिनेछ । एक टावरदेखि अर्को टावरसम्मको दुरी करिब २२४.९२४ मिटर हुनेछ । आयोजना निर्माणका लागि १६.८१ हेक्टर जग्गा आवश्यक पर्नेछ । आयोजनाको सबै काम २७ महिनाभित्र सम्पन्न गर्ने कम्पनीको लक्ष्य छ ।