ऊर्जा खबर
काठमाडाैं। अरूण तेस्रो जलविद्युत् आयोजनाको प्रवर्धक कम्पनी सतलजल जलविद्युत् निगम लिमिटेड (एसजेबिएन) अरूण तेस्रो पावर डेभलपमेन्ट कम्पनीले ७०२.९ मेगावाट बिजुली बिक्रीको लागि सार्वजनिक प्रस्ताव आह्वान गरेको छ।
कम्पनीले सोमबार सार्वजनिक सूचना जारी गरेर बिजुली किन्न अनुरोध गरेको हो। भारतीय कम्पनीले नौ सय मेगावाट आयोजना संखुवासभामा निर्माण गरिरहेको छ। अहिलेसम्म आयोजनाको करिब ४० प्रतिशत काम सकिएको छ।
कम्पनीले इच्छुक फर्म वा कम्पनीले ४ अप्रिल २०२१ सम्म बिजुली खरिदबिक्री प्रक्रियामा सहभागिता जनाउनुपर्ने बताएको छ। कम्पनीले जारी गरेको सूचनामा नेपाल, भारत र बंगलादेशका कम्पनीले खरिदबिक्री प्रक्रियामा सहभागिता जनाउन सक्ने उल्लेख गरेको छ। कम्पनीले सो बोलपत्रको फर्म कम्पनीको आधिकारिक वेबसाइटमा राखेको छ।
बोलपत्र प्रक्रियाबाट छनोट हुने कम्पनीले २५ वर्षसम्मको लागि एसजेबिएनसँग बिद्युत् खरिदबिक्री सम्झौता गर्नुपर्नेछ। सम्झौता अनुसार अरूण तेस्रो जलविद्युत् आयोजनाबाट उत्पादित नौ सय मेगावाट बिजुलीमध्ये २१.९ प्रतिशत (१९७.१ मेगावाट) बिजुली नेपाललाई निःशुल्क उपलब्ध गराउनु पर्नेछ।
कम्पनीले सन् २०२३ को सुरुआती चरणमै आयोजनाले उत्पादन गर्ने जनाएको छ। सतलज कम्पनीमा भारतीय केन्द्रीय सरकारको ६४.४६ प्रतिशत सेयर छ, जसमा हिमाञ्चल प्रदेशको २५.५१ प्रतिशत र बाँकी सर्वसाधारणको सेयर छ। यो आयोजनाको लागि ७० मिटर अग्लो ड्याम निर्माण गरिँदैछ।
११.७४ किलोमिटर हेडरेस टनेल मुख्य सुरुङ निर्माण गरिनेछ। उक्त सुरुङको ब्यास भने ९.५ मिटरको रहनेछ। अरूण तेस्रो जलविद्युत् आयोजनाको भारतीय प्रधानमन्त्री नरेन्द्र मोदी र नेपाली समकक्षी केपी शर्मा ओलीले २९ वैशाख २०७५ मा स्विच थिचेर शिलान्यास गरेका थिए।
