ऊर्जा खबर
काठमाडौं । सिंगटी हाइड्रो इनर्जी प्रालिकाे साधारण सेयर भर्ने मंगलबार (आज ) अन्तिम दिन हाे । कम्पनीले गत शुक्रबार (चैत ६ गते) बाट दोलखामा निर्माण सम्पन्न २५ मेगावाटको सिंगटी खोला जलविद्युत आयोजनाको सेयर बिक्री खुलाएकाेमा आवेदन दिने अवधि साँझ ५ बाट सकिन लागेकाे हाे ।
कम्पनीकाे सेयर भर्न लगानीकर्ताकाे उत्साहजनक सहभागिता देखिएकाे छ । साेमबारसम्मकाे तथ्यांकअनुसार १० लाख ७० लाखले सेयर खरिद गर्न आवेदन दिइसकेकाे कम्पनीका कार्यकारी निर्देशक गणेश कार्कीले बताए । उनका अनुसार सेयर आवेदकबाट २ अर्ब रुपैयाँ बढी रकम संकलन भइसकेकाे छ ।
‘मागभन्दा ७.१ गुणा बढीकाे आवेदन परिसकेकाे छ,’ उनले ऊर्जाखबरसँग भने, ‘आज साँझसम्ममा १० गुणा बढी आवेदन पर्न सक्ने सम्भावना देखिन्छ ।’ उनले सर्वसाधारणकाे उत्साहजनक सहभागिता देखिए पनि करिब २ लाख ६९ हजार ७ सय जनाले मात्रै गाेला प्रथाबाट १० कित्ता सेयर पाउने बताए ।
कम्पनीले प्रतिकित्ता १ सय रुपैयाँ अंकित मूल्यकाे २९ लाख कित्ता सेयर सर्वसाधारणलाई निष्कासन गरेको छ। निष्कासित सेयरमध्ये ५८ हजार कित्ता अर्थात् २ प्रतिशत सेयर कम्पनीमा कार्यरत कर्मचारीका लागि सुरक्षित गरिएको छ ।
१ करोड ४५ लाख रुपैयाँ बराबरको १ लाख ४५ हजार कित्ता अर्थात् ५ प्रतिशत सेयर सामूहिक लगानी कोषका लागि छुटट्याइएको छ । बाँकी २६ करोड ९७ लाख रुपैयाँ बराबरको २६ लाख ९७ हजार कित्ता सेयर सर्वसाधारणका लागि खुल्ला गरिएको कम्पनीले जनाएको छ ।
सर्वसाधारणले न्यूनतम १० कित्तादेखि अधिकतम २ लाख कित्तासम्म आवेदन दिन पाउनेछन् । कम्पनीले सेयर निष्कासन गरी बाँडफाँड गर्न मेगा क्यापिटललाई बिक्री प्रबन्धक तोकेको छ ।
कम्पनीले यसअघि पनि आयोजना प्रभावित स्थानीयका लागि छुट्याएको १४ करोड ५० लाख रुपैयाँ बराबरको १४ लाख ५० हजार कित्ता सेयर निष्कासन गरी बाडफाँड गरिसकेको छ । स्थानीयका लागि छुट्याइएको सेयरका लागि पनि मागभन्दा बढी आवेदन परेको थियो ।
कम्पनीले लगानी गरेको सिंगटी खोलाको निर्माण सम्पन्न भई परीक्षणसमेत सकिएको छ । १३२ केभी सिंगटी–लामोसाँघु प्रसारण लाइन पूरा भइनसकेकाले आयोजनाको विद्युत प्रणालीमा जोडिन सकेको छैन ।
प्रसारण लाइनको काम अन्तिम चरणमा पुगेकाले चालू आर्थिक वर्षभित्र आयोजनाबाट विद्युत उत्पादन सुरु हुँदैछ । आयोजना सञ्चालनमा आएपछि विद्युत बिक्रीबाट वार्षिक ७० करोड रुपैयाँ आम्दानी हुनेछ ।
.jpg)
.jpg)
.jpg)
