ऊर्जा खबर
काठमाडौँ । माथिल्लो मैलुङ खोला जलविद्युत् आयोजनाको परीक्षण अन्तिम चरणमा पुगेको छ । सानिमा ग्रुपअन्तर्गतको माथिल्लो मैलुङ खोला जलविद्युत् लिमिटेडले प्रवर्द्धन गरेको उक्त आयोजनाको परीक्षण अन्तिम चरणमा पुगेको र एक–दुई दिनभित्रै परीक्षण पूरा गरी राष्ट्रिय प्रसारणमा जोडेर परीक्षण उत्पादन सुरु गरिने कम्पनीका महाप्रबन्धक काङ्गडा प्रसाईले बताए ।
‘हामीले आफ्नो आन्तरिक सबै संरचनाको परीक्षण सकिसकेका छौँ,’ उनले ऊर्जा खबरसँग भने, ‘नेपाल विद्युत् प्राधिकरणको प्रतिनिधिको उपस्थितिमा हामीले हिजो प्रसारण लाइनको परीक्षण सकेका छौँ । आज स्वीचयार्ड परीक्षण सकेर विद्युत् गृहको परीक्षण नो लोडमा भइरहेको छ । यो सकेर भोलिबाट हामी लोड टेष्ट पनि सुरु गर्नेछौँ ।’
परीक्षण सबै पास भए प्राधिकरणको स्वीकृतिमा बुधबार १२ बजेदेखि परीक्षण उत्पादन सुरु गरिने छ ।
उनका अनुसार आयोजना निर्माण सुरु गरेको ३ वर्षमा पूरा भएको छ । आयोजनाको निर्माण लागत २ अर्ब ८० करोड पुग्ने छ । आयोजनाबाट उत्पादन हुने बिजुली त्रिशूली–३ बी हब सबस्टेसनमा जोडिने छ ।
सबस्टेसनसम्मको प्रसारण लाइन कम्पनी आफैले निर्माण गरेको छ । आयोजनामा सिद्वार्थ बैंकको अगुवाईमा नेपाल एसबीआई बैंकले १ अर्ब ८७ करोड ५० लाख रुपैयाँ ऋण लगानी गरेका छन् । योजनामा ७५ प्रतिशत ऋण र २५ प्रतिशत स्वपुँजी लगानी छ ।
सानिमा समूहले माथिल्लो मैलुङसहित ७३ मेगावाटको मध्यतमोर र २८.१ मेगावाटको तल्लो लिखु जलविद्युत आयोजना पनि निर्माण गरिरहेको छ ।
यो समूहले यसअघि २.६ मेगावाटको सुनकोसी साना, २२ मेगावाटको सानिमा माई र ७ मेगावाटको माइ क्यासकेड आयोजनाको सफल निर्माण गरी सञ्चालन गरिरहेको छ ।
आयोजनाको थप विवरण
आयोजना : माथिल्लो मैलुङ खाेला
क्षमता : १४.३ मेगावाट
प्रवर्द्धक : माथिल्लो मैलुङ खोला जलविद्युत कम्पनी
आयोजनास्थल : रसुवा
सुरुङ : १.८ किलोमिटर
विद्युत जोडिने स्थल : त्रिशुली–३ बी
लागत : २ अर्ब ८० करोड रुपैयाँ
ऋण लगानी : १ अर्ब ८७ करोड ५० लाख रुपैयाँ (७० प्रतिशत)
वित्तिय संस्था : सिद्वार्थ बैंक, नेपाल एसबीआई बैंक
वार्षिक विद्युत उत्पादन : ७ करोड ९६ लाख ७० हजार ४ सय ८६ किलोवाट घन्टा
