ऊर्जा खबर
काठमाडौं । लगानी बोर्डले निजी क्षेत्रले अघि बढाएका २ जलविद्युत आयोजनाको ९७ अर्ब रुपैयाँ बराबरको लगानी स्वीकृत गरेको छ । बोर्डको मंगलबार बसेको ४७औं बैठकले ताप्लेजुङमा निर्माण हुने २८५ मेगावाटको माथिल्लो तमोर र मनाङ्गमा निर्माण हुने १३९.२ मेगावाटको तल्लो मनाङ्ग मरस्याङ्दी जलविद्युत आयोजनाको लगानी स्वीकृत गरेको हो ।
सानिमा हाइड्रो समूहले अघि बढाएको माथिल्लो तमोर निर्माणका लागि ६४ अर्ब रुपैयाँ रुपैयाँ लगानी स्वीकृत भएको छ । विद्युत विकास विभागले यो आयोजनाको उत्पादन अनुमतिपत्र जारी गरिसकेको छ ।
आयोजना अघि बढाउन पहुँच सडक निर्माण, आवश्यक विद्युत उपयोगका लागि प्रसारण लाइनको निर्माण लगायत प्रारम्भिक चरणका कामहरू सम्पन्न भइसकेका छन् । सानिमा समूहले यो आयोजनामा जापानबाट लगानी भित्र्याउँदैछ ।
यस्तै, बुटवल पावर कम्पनी (बिपिसी) ले अघि बढाएको तल्लो मनाङ्ग मर्स्याङ्दी निर्माणका लागि ३३ अर्ब ४१ करोड ४० लाख रुपैयाँ बराबरको लगानी स्वीकृत भएको छ । यो आयोजनामा चिनियाँ समूहले कूल लागतको ८० प्रतितश लगानी गर्दैछ । बिपिसीको २० प्रतिशत लगानी हुनेछ ।
बिपिसीले १३५ मेगावाटको मर्स्याङ्दीसँगै यो आयोजनाको निर्माण पनि एकसाथ सुरु गर्ने भएको छ । ६ अर्ब रुपैयाँभन्दा बढी लागतका जलविद्युत आयोजनाको लगानी बोर्डले स्वीकृत गर्ने प्रावधान छ ।
बैठकले ६७९ मेगावाटको तल्लो अरुण जलविद्युत आयोजनाको अध्ययन अनुमतिपत्र भारतको एसजेभिएन लिमिटेडलाई दिन गरिने समझदारी पत्र (एमओयु) को मस्यौदा पनि स्वीकृत गरेको छ । साथै, एसजेभिएनकै लगानीमै निर्माणाधीन ९ सय मेगावाटको अरुण–३ जलविद्युत आयोजनाको प्रवेश मार्गमा पर्ने जग्गाको मुआब्जा उपलब्ध गराउन आवश्यक प्रक्रिया अघि बढाउने निर्देशन बैठकले बोर्डलाई दिएको छ ।
यस्तै, बैठकले ७५६ मेगावाटको तमोर जलाशय आयोजनाको अध्ययन अनुमतिपत्र दिने सम्बन्धमा आएका अस्पष्ट विषयको सम्बोधन गरी कानुनगत सुधार गर्न ऊर्जा, जलस्रोत तथा सिँचाइ मन्त्रालयलाई निर्देशन दिएको छ ।
