ऊर्जा खबर
काठमाडौं । विद्युत विकास विभागले एक महिनामा ३ जलविद्युत आयोजनालाई उत्पादन अनुमतिपत्र दिएको छ । विभागले ऊर्जा उत्पादकले अध्ययन पूरा गरेको ५८.२ मेगावाटका आयोजनालाई निर्माण अनुमति दिएको हो ।
सबैभन्दा ठूला रुकुममा निर्माण गर्न लागिएको ४४.५२ मेगावाटको सानी भेरी जलविद्युत आयोजनाले अनुमति पाएको विभागले जनाएको छ । विभागका अनुसार एक्सपर्ट हाइड्रो इन्भेष्मेन्ट प्रालिले उक्त आयोजना अघि बढाउन माघ ११ गते अनुमति पाएको छ।
४.९ मेगावाटको माथिल्लो पिखुवा खोला निर्माण गर्न सुम्निमा हाइड्रो पावर कम्पनी लिमिटेडले माघ ९ गते अनुमति पाएको विभागको तथ्यांकमा छ । यो आयोजना भोजपुरमा निर्माण हुनेछ ।
यस्तै, ताप्लेजुङमा ९.३ मेगावाटको सिवा खोला निर्माण गर्न मेवा डेभलपर्सले माघ १९ गते अनुमति पाएको छ । विभागका अनुसार चालु आर्थिक वर्ष २०७९/८० को ७ महिनामा करिब ५१९ मेगावाटका १७ जलविद्युत आयोजनाले उत्पादन अनुमति पाएका छन् । अहिलेसम्म ८ हजार ६ सय ६५ मेगावाट विद्युत उत्पादन गर्न २३५ जलविद्युत कम्पनीले अनुमति पाएकाकाे विभागकाे वेपसाइटमा उल्लेख छ।
यस्तै, माघ महिनामा ४ जलविद्युत कम्पनीले ७१.०८ मेगावाट विद्युत उत्पादन अनुमतिका लागि आवेदन दिएको विभागले जनाएको छ । विभागका अनुसार ९.४८ मेगावाटको तल्लो दुधकुण्ड, १२.५ मेगावाटको म्याग्दी खोला ‘बी’, ८.८ मेगावाटको निसी खोला र ४०.०३ मेगावाटको माथिल्लो सिम्बुवा खोलाले अध्ययन पूरा गरी उत्पादन अनुमतिका लागि आवेदन दिएका हुन् ।
यो अवधिमा २० मेगावाटको दुई आयोजनाले अध्ययन अनुमति पाएका छन् भने २०४.१० मेगावाटका दुई आयोजनाले अध्ययन अनुमतिका लागि विभागका आवेदन दिएका छन् ।
