६ महिनामा १३ अर्ब २४ कराेडको विद्युतीय सवारी आयात

काठमाडौँ । चालु आर्थिक वर्ष (आव) २०८०/८१ को ६ महिनाको अवधिमा १३ अर्ब २४ करोड रुपैयाँ बराबरको विद्युतीय सवारी साधन आयात भएको छ । भन्सार विभागको तथ्यांकअनुसार पुससम्ममा साना–ठूला जीप, भ्यान तथा मोटरसाइकल र तीन पाङ्ग्रेसमेत गरी १० हजार बढी सवारी आयात भएका छन् ।

भन्सार विभागले आइतबार (माघ ७ गते) सार्वजनिक गरेको तथ्यांकअनुसार विद्युतीय गाडीको आयात उल्लेख्य बढेको देखिएको छ । सरकारले विद्युतीय सवारी साधनलाई प्राथमिकता दिँदै न्यून भन्सार शूल्क लगाएपछि यस्ता गाडीको आयात बढेको हो ।

विभागकाअनुसार ६ महिनाको अवधिमा १० हजार १३६ विद्युतीय सवारी आयात भएका छन् । यसमध्ये सबैभन्दा बढी तीन पाङ्ग्रे सवारी आयात भएका छन् । साउनदेखि पुससम्मको अवधिमा ५०३५ विद्युतीय सवारी आयात भएको विभागको तथ्यांकमा उल्लेख छ ।

यसैगरी, ५० किलोवाटभन्दा कम क्षमताका २०५० सवारी आयात भएको छ । यी सवारीको मूल्य ३ अर्ब ८३ करोड ५४ लाख १७ हजार रुपैयाँ मूल्य रहेको छ । २९ सय ७० वटा ५१ किलोवाट क्षमतादेखि १०० किलोवाट क्षमताका विद्युती सवारी आयात भएको छ ।

१०१ देखि २०० किलोवाट क्षमताका ६८ वटा गाडीको आयात भएको छ । त्यस्तै २०० किलोवाटभन्दा माथिका गाडी पनि १३ वटा आयात भएका छन् । चालु वर्षको ६ महिनामा विद्युतीय गाडी आयातबाट मात्रै ५ अर्ब राजस्व संकलन भएको छ ।

यसैगरी, यो अवधिमा ६६ अर्ब ४९ करोड रुपैयाँको डिजेल आयात भएको छ । यसैगरी ३३ अर्ब ९२ करोड रुपैैयाँको पेट्रोल आयात भएको छ ।