ऊर्जा खबर
काठमाडौँ । सौर्य ऊर्जाको क्षेत्रमा काम गर्दै आइरहेको क्वालिटी रिन्यूएबल इनर्जी प्रा.लि.ले एकसाथ दुई वटा अवार्ड प्राप्त गरेको छ । सोलार क्वाटर साउथ एसियाले काठमाडौँमा आयोजना गरेको नवीकरणीय ऊर्जा सप्ताह–२०२४, नेपालको अवसरमा क्वालिटी रिन्युएबल इनर्जीले ‘वेष्ट ग्रामीण इलेक्ट्रिफिकेसन अवार्ड’ र ‘वेष्ट सोलार अफ ग्रीड प्रोजेक्ट अफ द एयर–२०२४’ प्राप्त गरेको हो ।
नेपाल विद्युत् प्राधिकरणका कार्यकारी निर्देशक कुलमान घिसिङले ती दुवै अवार्ड कम्पनीका प्रमुख अपरेटिङ अफिसर (सिओओ) तुफान गौतमलाई प्रदान गरे । सोही अवसरमा घिसिङले दुर्गम र ग्रामीण क्षेत्रमा सौर्य ऊर्जामार्फत नागरिकलाई उज्यालो प्रदान गर्न क्वालिटी रिन्यूएबलले महत्त्वपूर्ण भूमिका खेलेको बताए ।
कम्पनीका सिओओ गौतमले हिमाली जिल्ला मुस्ताङका बवस्तीमा सोलारको माध्यमबाट घरघरमा बिजुली पुर्याएको र दुर्गम सल्यानका बस्तीमा सोलारमार्फत खानेपानीको आयोजना सम्पन्न गरेकोले त्यसको मूल्याङ्कन भएको बताए । क्वालिटीले सौर्य ऊर्जाबाट अफ ग्रीड र अन ग्रीडमार्फत विद्युत् उत्पादन गरी सेवा प्रदान गर्दै आइरहेको छ । आफ्नो कम्पनीले नवीकरणीय ऊर्जाका सबै आयाममा काम गर्दै आइरहेको उनको भनाइ छ ।
कम्पनीले सोलार होम सिस्टम, संस्थागत सोलार प्रणाली, रुफ टप सिस्टम, मिनी ग्रीड, सडक सोलार बत्ति, सुधारिएको चूलो, विद्युतीय चुलो, वाटर हिटर, बायोग्यास लगायत नवीकरणीय क्षेत्रमा काम गरीरहेको जनाइएको छ । सोही अवसरमा नवीकरणीय ऊर्जा क्षेत्रमा काम गर्ने विभिन्न व्यक्ति र संस्थाहरू सम्मानित भएका थिए ।
