ऊर्जा खबर
काठमाडौं । चालू आर्थिक वर्ष (२०७८/७९) को फागुनसम्म करिब १२ हजार घरेलु सौर्य विद्युत प्रणाली जडान गरिएकाे छ । अर्थ मन्त्रालयले सार्वजानिक गरेको आर्थिक सर्वेक्षण (२०७८/७९) मा उक्त तथ्याङ्क उल्लेख गरिएको हो ।
आर्थिक सर्वेक्षणका अनुसार फागुनसम्म ११ हजार ९ सय ५६ वटा सौर्य घरेलु विद्युत जडान गरिएको छ । गत वर्ष (२०७७/७८) मा भने १२ हजार ५ सय ६७ सौर्य विद्युत प्रणाली जडान भएको थियो । साथै, उक्त आर्थिक वर्षमा १३ हजार ४ सय ५५ वटा सुधारिएको चुल्हो पनि जडान गरिएको थियो ।
यस्तै, चालू आर्थिक वर्षको फागुनसम्म १ हजार ७ सय ३३ वायोग्यास प्लान्ट जडान भएका छन्, जबकि, आव (२०७७/७८) मा भने ३ हजार ९ सय ७५ रहेको छ । गत वर्षको तुलनामा वायोग्यास प्लान्टको जडान घटेको तथ्याङ्कमा उल्लेख गरिएको छ ।
वैकल्पिक ऊर्जा अन्तर्गतका लघु तथा साना जलविद्युत आयोजनाबाट आर्थिक वर्ष २०७८/७९ को फागुनसम्म ३९८ किलोवाटको विद्युत उत्पदन भएको छ । गत वर्षको तुलनामा विद्युत उत्पादन घटेको देखिएको छ । आथिर्क वर्ष २०७७/७८ मा ९५५ किलोवाट विद्युत उत्पादन भएको थियो ।
यसैगरी, आर्थिक वर्ष २०७७/७८ मा सौर्य तथा वायु ऊर्जाबाट २८४ किलोवाट विद्युत उत्पादन भएकोमा चालु आर्थिक वर्षको फागुनसम्ममा भने २०० किलोवाट मात्र विद्युत उत्पादन भएको छ । २०७८ फागुनसम्म नवीकरणीय ऊर्जा कार्यक्रमबाट प्रत्यक्ष÷अप्रत्यक्ष गरी ४० हजार रोजगारी सिर्जना भएको छ ।
