ऊर्जा खबर
काठमाडौं । माँ दुर्गा काली हाइड्रो पावर कम्पनी प्रालिले ४.९५ मेगावाटको मिवाजे खोला साना जलविद्युत आयोजना ३ वर्षमा सम्पन्न गर्ने लक्ष्य राखेको छ । कम्पनीले अध्ययन पुरा भएको आयोजनाको काम २०८३ असार महिनाभित्र सम्पन्न गर्ने लक्ष्य लिएकाे हो ।
गण्डकी प्रदेश, कास्की जिल्लाको माछापुच्छ्रे गाउँपालिकामा अवस्थित मिवाजे खोलामा पहिचान भएको आयोजना अघि बढाउन विद्युत विकास विभागमा आवेदन दिएको कम्पनीले जनाएको छ । कम्पनीका अनुसार विभागबाट अनुमति पाउने लगतै आयोजना निर्माणको काम सुरु गर्नेछ ।
आयोजना निर्माण तथा सञ्चालन गर्दा पर्न सक्ने प्रतिकुल असरका विषयमा सरोकारवालासँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र सुझाव दिन पनि माग गरेको छ ।
नदी प्रवाहमा आधारित (रन अफ रिभर) प्रकारको आयोजनाको जडित क्षमता ४.९५ मेगावाट हुनेछ । यस आयोजनाको डिजाइन बहाव ०.८४ घनमिटर प्रति सेकेन्ड र कुल हेड ७०२.०० मिटर रहनेछ । आयोजनाबाट वार्षिक सरदर २९.८३० गिगावाट घन्टा विद्युत उत्पादन हुनेछ ।
आयोजनाको प्रमुख संरचनाहरू र विद्युतगृह मिवाजे खोलाको बायाँ किनारमा पर्दछन् । विद्युत गृहमा जडित २ वटा २५०० किलोवाट क्षमताको पेल्टन टर्वाइनहरूमा पानी खसाली सो टवाईनसँग जोडिएका २ वटा ३ फेज जेनेरेटर मार्फत विद्युत उत्पादन गरिनेछ ।
विद्युत उत्पादनपछि ४५०० मिटर लम्बाई भएको टेलरेसद्वारा पुनः मिवाजे खोलामा पानी छोडिनेछ । उतपादित ऊर्जालाई ३३ केभी सिंगल सर्कट प्रसारण लाइन मार्फत ३.५ किलोमिटर लामो माथिल्लो सेती खोला जलविद्युत आयोजनाको स्वीच्यार्डमा जडान हुनेछ ।
आयोजनाको काम ३ वर्षमा सम्पन्न गर्ने लक्ष्य राखेको छ । आयोजना निर्माण तथा सञ्चालन गर्दा भू–क्षय वायु प्रदुषण आदिद्वारा वातावरणमा उल्लेखनीय प्रतिकुल असर नपर्ने गरी निर्माण गरिनेछ ।
