ऊर्जा खबर
काठमाडौं । वर्षासँगैको बाढीले संरचनामा क्षति पुगेपछि पटक-पटक बन्द भएको १० मेगावाटको तल्लो मोदी–१ जलविद्युत केन्द्रकाे विद्युत उत्पादन सुचारु भएकाे छ । निरन्तरको वर्षाले पानीको बहाव बढेर संरचनामा क्षति पुग्न थालेपछि बन्द गरिएको जलविद्युत केन्द्र मर्मत गरी शुक्रबार साँझदेखि नियमित सञ्चालनमा आएको हो ।
असार २२ गते राति आएको बाढीले आयोजनाको संरचनामा क्षति पुग्दा बन्द भएको जलविद्युतगृहको उत्पादन १० दिनपछि पुनः सुरु भएको युनाइटेड मोदी हाइड्रोपावर लिमिटेडका प्रबन्ध निर्देशक उपेन्द्र गौतमले बताए । उनका अनुसार क्षतिग्रस्त संरचनाको मर्मत गरेर उत्पादन सुचारु गरिएको हो ।
बाढीले आयोजनाको मुहान, ३ सय मिटर निकास नहरलगायतका संरचनामा क्षति पुयार्एको थियो । खोलामा पानी र लेदो मिसिएर आइरहेकाले मेसिन चलाउन कठिनाई भएपछि उत्पादन बन्द गरिएको थियो ।
करिब डेढ हप्ता विद्युतगृह बन्द हुँदा विद्युत बिक्रीबाट हुने १ करोड २० लाख रुपैयाँ बढी आम्दानी गुमेको उनले बताए । कम्पनीले विद्युत बिक्रीबाट दैनिक १२ लाख रुपैयाँ आम्दानी गर्दै आएको छ ।
क्षतिग्रस्त संरचना मर्मत गरेर गत आइतबार (२७ गते) देखिनै विद्युतगृह सञ्चालनको प्रयास गरिएको थियो । तर, खोलामा बाढी बढेर फेरि संरचनामा क्षति पुर्याएकाले उत्पादन बन्द गरी मर्मत गरिएको थियो । कम्पनीले निर्माण सम्पन्न गरेको जलविद्युत केन्द्रले २०६९ मंसिर ९ गतेदेखि विद्युत उत्पादन सुरु गरेको हो ।
