ऊर्जा खबर
काठमाडौं । बरुण हाइड्रो पावर कम्पनीको चालू आर्थिक वर्षको तेस्रो त्रैमासिकको वित्तीय विवरण कमजोर देखिएको छ । कम्पनीको विद्युत बिक्रीबाट हुने आम्दानी घटेसँगै खुद नाफा पनि घटेकाे छ ।
कम्पनीले सार्वजनिक गरेको वित्तीय विवरण अनुसार आवकाे तेस्रो त्रैमाससम्ममा ५२ लाख ७२ हजार रुपैयाँ खुद नाफा कमाएको छ । यो गत वर्षको यही अवधिको तुलनामा ६४ लाख २९ हजार रुपैयाँ कम हो । गत वर्ष याे अविधमा कम्पनीले १ करोड १७ लाख १ हजार रुपैयाँ खुद नाफा कमाएको थियो ।
यसअवधिमा कम्पनीको विद्युत बिक्रीबाट हुने आम्दानी पनि १ करोड ९६ लाख ६३ हजार रुपैयाँले घटेको छ । कम्पनीले यो अवधिसम्ममा ४ करोड ५८ लाख २२ हजार रुपैयाँ आम्दानी गरेको छ । गत आवको यही अवधिमा ६ करोड ५५ लाख ८६ हजार रुपैयाँ आम्दानी गरेको थियो ।
प्रसारण लाइनका कारण आयोजना पूर्ण क्षमतामा चल्न नपाएकाले आम्दानी घटेको कम्पनीले जनाएको छ । कम्पनीको ४.४४५ मेगावाटको हेवा खाेला सञ्चालनमा छ ।
पाँचथर पावरले २ करोड ९५ लाख रुपैयाँ खुद नाफा कमायो
पाँचथर पावर कम्पनीले २ करोड ९५ लाख ४६ हजार रुपैयाँ खुद नाफा कमाएको छ । कम्पनीले सार्वजनिक गरेको वित्तिय विवरण अनुसार चालु आर्थिक वर्षको तेस्रो त्रैमाससम्मको अवधिमा सो मुनाफा आर्जन गरेको हो ।
यो नाफा गत वर्षको यही समयअवधिको तुलनामा भने घटेको कम्पनीले जनाएको छ । कम्पनीले गत वर्ष यही समयअवधिमा ६ करोड ६४ लाख ३३ हजार रुपैयाँ खुद नाफा कमाएको थियो ।
कम्पनीको विद्युत बिक्रीबाट हुने आम्दानी पनि गत वर्षको तुलनामा ४ करोड ५ हजार रुपैयाँ घटेको छ । खोलामा पानीको प्रवाह कम हुन गएको विद्युत उत्पादन आम्दानी पनि घटेको कम्पनीले जनाएको छ । कम्पनी अनुसार आवको तेस्रो त्रैमाससम्म विद्युत बिक्रीबाट २६ करोड ७१ लाख ५० हजार रुपैयाँ आम्दानी भएको छ । गत वर्ष यही समयअवधिमा ३० करोड ७१ लाख ५५ हजार रुपैयाँ आम्दानी भएको थियो ।
यही अवधिमा कम्पनीले अन्य स्रोतबाट ४ लाख ४८ हजार रुपैयाँ आम्दानी गरेको छ । कम्पनीको प्रतिसेयर आम्दानी १२.२८ रुपैयाँ रहेको छ । प्रतिसेयर नेटवर्थ ८८.५१ रुपैयाँ रहेको छ । कम्पनीको १४.९ मेगावाटको हेवा खोला ‘ए’ सञ्चालनमा छ ।
