ऊर्जा खबर
काठमाडौँ । नेपाल तथा बेलायतबीच मैत्री सन्धि गाँसिएकाे सय वर्ष पुगेकाे अवसरमा बेलायत नेपालकाे आर्थिक विकास तथा जलवायु परिवर्तनका क्षेत्रमा सहयाेग गर्ने घाेषणा गरेकाे छ । दुई देशकाे सम्बन्धका विषयका चर्चा गर्दै बेलायती प्रधानमन्त्री ऋषि सुनकले उक्त घाेषणा गरेका हुन् ।
प्रधानमन्त्री सुनकले बेलायत र नेपालबीच व्यापार, लगानी लगायत आर्थिक क्षेत्र तथा जलवायु परिवर्तनबाट परेकाे असर न्यूनीकरणमा सहयाेग गर्ने घाेषणा गरेकाे लण्डनस्थित नेपाली राजदूतावासले जनाएको छ। उनले बेलायत र नेपालबीचको ऐतिहासिक सम्बन्धका विभिन्न आयामका बारेमा चर्चा गर्दै द्विपक्षीय सम्बन्धलाई अझ सुदृढ तुल्याउन ‘ब्रिटिस गोर्खा’को योगदानको प्रशंसा गरेकाे उल्लेख छ ।
दुई देशबीचको सम्बन्धबारे चर्चा गर्दै बेलायतले नेपालको विकास प्रयासमा सहयोग गरिरहेको र त्यो जारी रहने बेलायतका परराष्ट्र राज्यमन्त्री आन मारी ट्रेवल्यानले बताए । उनले नेपाालसँगको आर्थिक सम्बन्धलाई थप विस्तार गरी उसको मध्यम आययुक्त मुलुक बन्ने लक्ष्यमा सहयाेग गर्ने प्रतिबद्धता जनाए ।
बेलायतस्थित नेपाली राजदूत ज्ञानचन्द्र आचार्यले प्रधानमन्त्री पुष्पकमल दाहालका तर्फबाट उनका समकक्षी सुनकप्रति शुभकामना व्यक्त गरेकाे जनाइएकाे छ । उनले सन् १९२३ मा सम्पन्न मैत्रीसन्धिका विविध पक्षको चर्चा गर्दै मैत्रीसन्धिपश्चात् अन्तर्राष्ट्रिय क्षेत्रमा नेपालको उपस्थिति र अन्तर्राष्ट्रिय सम्बन्ध प्रवर्द्धन गर्न महत्त्वपूर्ण योगदान भएको उल्लेख गरेका थिए ।
आचार्यले आगामी एक सय वर्षमा नेपाल–बेलायत द्विपक्षीय सम्बन्धलाई थप क्षेत्रमा विस्तार गरी पारस्परिक सम्बन्ध अझ सुदृढ तुल्याउन दुवै पक्षबाट महत्त्वपूर्ण भूमिका निर्वाह हुनेमा आफू विश्वस्त रहेको बताए। नेपाल र बेलायतबीच सन् १९२३ को मैत्रीसन्धिमा हस्ताक्षर भएको सय वर्ष पुगेको उपलक्ष्यमा विभिन्न कार्यक्रम आयोजना गरिएकाे थियाे ।
