४ महिनामा १४ प्रसारण लाइन आयोजनाले पाए अध्ययन अनुमति 

काठमाडौं । विद्युत विकास विभागले ४ महिनामा १४ प्रसारण लाइन आयोजनालाई अध्ययन अनुमति दिएको छ । विभागले निर्माणाधीन र निर्माणमा जाने तयारीमा रहेकाे जलविद्युत तथा साैर्य आयाेजनाकाे विद्युत प्रवाह हुने ३३ केभीदेखि २२० केभी क्षमतासम्मका प्रसारण लाइन आयोजनालाई अध्ययन अनुमति दिएको हो । 

विभागका अनुसार बैशाखदेखि साउनसम्मकाे अवधिमा १४ प्रसारण लाइन आयोजनाले अध्ययन अनुमति पाएका हुन् । अध्ययन अनुमति पाएका आयोजनाहरू नेपाल विद्युत प्राधिकरण र निजी क्षेत्रका रहेका छन् । निर्माणका चरणमा रहेका, निर्माणमा जाने तयारीमा रहेका विद्युत आयोजनाको बिजुली प्रवाह हुने संरचना तयार गर्नका लागि विभागले उक्त प्रसारण लाइन आयोजनालाई अध्ययन अनुमति दिएको हो ।

अध्ययन अनुमति पाउनेमा २२० केभी, १३२ केभी र ३३ केभी क्षमताका प्रसारण लाइन छन् । २२० केभी क्षमताका ३, १३२ केभी क्षमताका ८ र ३३ केभी क्षमताका ३  प्रसारण लाइन आयोजनाले अध्ययन अनुमति पाएको विभागको तथ्यांकमा उल्लेख छ । 

२२० केभी क्षमताका ओखरापौवा-तिनपिप्ले प्रसारण लाइनले बैशाख २६ गते अध्ययन अनुमति पाएको थियो । यस प्रसारण लाइन आयोजनाको अध्ययन प्राधिकरणले गरिरहेकाे छ । साथै, २२० केभी क्षमताका डुकुछाप–सिरुटार–नालागुम्बा–लप्सीफेदी र लप्सीफेदी–कपन–गुम्बा–तिनपिप्ले प्रसारण लाइन आयोजनाले पनि अध्ययन अनुमति पाएका छन् । 

यसैगरी, १३२ केभी क्षमताका मेवा खोला, स्याउले–सन्फेबगर, करुवा सेती, बफीकोट–कुंग्री, बालाजु-सिंहदरबार, टेकु-थापाथली, सिरुटार–हरिसिद्धी–पाटन र सुपर तल्लो बागमती प्रसारण लाइन आयोजनाले अध्ययन अनुमति पाएकाे तथ्यांकमा छ ।

यसैगरी, ३३ केभी क्षमताका मध्य तारा खोला, बलेफी–ए र जिरा भवानी प्रसारण लाइन आयोजनाले पनि अध्ययन अनुमति पाएका छन् ।