ऊर्जा खबर
काठमाडौँ । अमेरिकी अनुदान सहयोगमा निर्माण अगाडि बढाइएको ४०० केभी प्रसारण लाइन, सबस्टेसन तथा सडक मर्मत परियोजनाका सम्बन्धमा अमेरिकी राजदूत डिन आर थम्पसनसँग छलफल भएको छ । आज ऊर्जा, जलस्रोत तथा सिँचाइ मन्त्री दीपक खड्कासँगको भेटमा उक्त विषयमा छलफल भएको हो ।
राजदूतसँगको भेटका क्रममा मन्त्री खड्काले एमसिसी मार्फत अगाडि बढाइएका परियोजनाको काम निरन्तर अगाडि बढिरहे पनि केही समयदेखि होल्ड भएकाले अन्यौलता सिर्जना भएको बताए । यी परियोजना निरन्तर अगाडि बढ्ने र ऊर्जा क्षेत्रमा अमेरिकाको थप सहयोग हुने मन्त्री खड्काले विश्वास व्यक्त गरे ।
सोही क्रममा राजदूत थम्पसनले नेपालको ऊर्जा क्षेत्रमा अमेरिकाको निरन्तर साथ र सहयोग रहने बताए । एमसिसी परियोजना अगाडि बढाउन हरसम्भव पहल र प्रयास भइरहेको उनको भनाइ थियो । उनले एमसिसी अन्तर्गत अगाडि बढाइएका परियोजनालाई निरन्तर अगाडि बढाउन सरकारको तर्फबाट गर्नुपर्ने सहयोगका लागि आग्रह गरे ।
एमसिसी अन्तर्गत सञ्चालित परियोजनाका लागि अमेरिकाले ५० करोड अमेरिकी डलर र नेपालले १९ करोड ७० लाख डलर लगानी गर्ने सम्झौता छ । उक्त परियोजना अन्तर्गत लप्सीफेदी–रातमाटे, रातमाटे–दमौली, दमौली–बुटवल र बुटवलदेखि नेपाल–भारत सीमा (गोरखपुर) सम्म ४०० केभी प्रसारण लाइन र सम्बद्ध सबस्टेसन निर्माण हुनेछन् । साथै, सडक मर्मत परियोजना समेत रहेको छ ।
२०८१ साल माघ ७ गते अर्थात् जनवरी २०,२०२५ मा वैदेशिक सहयोगमा रोक लगाउने अमेरिकी राष्ट्रपति डोनाल्ट ड्रमको निर्देशनपछि एमसिसी परियोजनाका काम अगाडि बढ्न सकेका छैनन् ।
.jpg)
