ऊर्जा खबर
काठमाडौं । तेह्रथुम पावर कम्पनीको सेयर आवेदन खुल्ला भएको छ । कम्पनीको तेह्रथुममा सञ्चालित साढे ७ मेगावाटको माथिल्लो खोरुङ्गा खोला जलविद्युत आयोजना प्रभावित स्थानीयका लागि छुट्याएको सेयर बिक्री खुल्ला गरेको हो ।
सय रुपैयाँ अंकित ४ करोड रुपैयाँ बराबरको ४ लाख कित्ता सेयर बिक्री खुल्ला गरेको कम्पनीले जनाएको छ । कम्पनीका अनुसार स्थानीयले न्युनतम १० कित्तादेखि अधिकतम ६० हजार कित्ताका लागि आवेदन दिन पाउनेछन् । आवेदकले छिटोमा साउन १९ गतेसम्म र ढिलोमा भदौ २ गतेसम्म आवेदन दिन पाउनेछन् ।
पहिलो चरणमा स्थानीयका लागि छुट्याएको सेयर निष्कासन गरी बाँडफाँड पूरा भएपछि सर्वसाधारणका लागि छुट्याएको सेयर निष्कासन गरीनेछ । २० प्रतिशत हुन आउने ८ करोड रुपैयाँ मूल्यको ८ लाख कित्ता सेयर सर्वसाधारणका लागि छुट्याइएको छ ।
कम्पनीले स्वपुँजी लगानीको ३० प्रतिशत सेयर निष्कासन गर्न लागेको हो । जसमा १० प्रतिशत सेयर स्थानीयका लागि निष्कासन गरिएको छ ।
कम्पनीले सेयर निष्कासन गरी बाँडफाँड गर्न एनआइविएल एस क्यापिटललाई बिक्री प्रबन्धक तोकिएको छ । स्थानीयले सेयर खरिदका लागि माछापुच्छ्रे बैंकको हिले र धनकुटा शाखा कार्यालय, नेपाल बङ्गलादेश बैंकको सक्रान्ती, फेदाप, छथर, सिधुवा, साँगुरीगढी र राजारानी शाखा कार्यालय, ग्लोबल आइएमई बैंकको जिरी खिम्ती शाखा, म्याङलुङ, तेह्रथुम र जलविद्युत आयोजना स्थल मेन्छ्यायेमा गाउँपालिका आवेदन दिन सकिने कम्पनीले जनाएका छ ।
कम्पनीले नेपाल धितोपत्र बोर्डबाट गत ११ गते सेयर निष्कासन अनुमति पाएको थियो । कम्पनीले पहिलो पटक २०७६ असोज १३ गते सेयर निष्कासन गरी बाँडफाँड गर्ने अनुमतिका लागि बोर्डमा आवेदन दिएको थियो । लामो समयसम्म थप प्रक्रिया अघि नबढेपछि बोर्डले कम्पनीलाई सूचीबाट हटाइदिएको थियो । कम्पनीले केही महिनाअघि दोस्रो पटक आवेदन दिएको थियो । कम्पनीले निर्माण गरेको आयोजना सञ्चालनमा छ ।
.jpg)