ऊर्जा खबर
काठमाडौं । चौधरी ग्रुपअन्तर्गत रहेको सीजीएग्रोटेकले विश्वको फ्ल्यागसीपफ्रीजोन डीएमसीसी र दुबई प्राधिकरणसँग ‘कमोडिटी ट्रेड’कालागि सम्झौतापत्रमा हस्ताक्षर गरेको छ । कृषि क्षेत्रमा दक्षिण एसियाका रास्ट्रहरूमा व्यापार बढाउन सम्झौता गरिएको हो ।
दक्षिण एसियाका राष्ट्रहरूसँग द्विपक्षीयव्यापार बढाउन मद्दत पुग्ने सीजीएग्रोटेकले जनाएको छ । सम्झौतापत्रमा चौधरी ग्रुपका प्रबन्ध निर्देशक वरुण चौधरी र डीएमसीसीका चिफअपरेटिङ अफिसर फेरयाल अहमदीले सम्झौतापत्रमा हस्ताक्षर गरे।
यस सहकार्यले डीएमसी र सीजीएग्रोटेकबीच बलियो सम्बन्ध स्थापना गर्नुका साथै डीएमसीसीका सदस्य कम्पनीहरूका लागि व्यापार, लगानी र बजार पहुँच बढाउन समेत सहयोग पुग्ने कम्पनीले जनाएको छ । यसबाहेक, यस साझेदारीले ज्ञान र सूचनाको आदानप्रदानलाई बढावा दिनेछ भने विशेष गरी कफी, चिया र महको निर्यातमा रहेका अवसर तथा अफ्ठ्याराहरूको सम्बोधन गर्न मद्दत गर्नेछ ।
यस सम्झौताप्रति उत्साह व्यक्त गर्दै सीजीएग्रोटेकका प्रवन्ध निर्देशक चौधरीले डीएमसीसीसँगको साझेदारीले नेपाल–युएई बीच रहेको कृषिव्यापार सम्बन्ध अझ सुदृढ र बलियो हुने विश्वास व्यक्त गरे ।
‘डिएमसीसीसँग रहेको २३ हजार सदस्य कम्पनीहरूको व्यापक नेटवर्कको लाभ उठाउँदै र पारस्परिक रूपमा लाभदायक अवसरहरूको अन्वेषणले द्विपक्षीय व्यापारलाई अझ व्यापक बनाउनका लागि हाम्रो क्षमतामा महत्वपूर्ण प्रभाव पार्नेछ,’ चौधरीले भने ।
डीएमसीसीका चिफअपरेटिङ अफिसर फेरयाल अहमदीले हालका वर्षहरूमा दक्षिण एसियामा कृषि वस्तुको आयातमा उल्लेखनीय वृद्धि भएको छ र यो वृद्धिदर जारी रहने बताए । साथै, खाद्य सुरक्षामा आएको जागरुकताका कारण विश्वव्यापी रूपमा कृषि वस्तुहरूको माग अझ बढ्ने उनले बताए । ‘यो साझेदारीको माध्यमबाट डीएमसीसीलाई यी व्यापारिक अवसरहरूको मूल्यांकन गर्न मद्दत पुग्नेछ,’ उनले भने ।
सीजीएग्रोटेकको बारेमा
सीजीएग्रोटेक नेपालमा कृषिजन्य वस्तुको उत्पादन र विक्री वितरण गर्दै आएको एक अग्रणी संस्था हो । यस कम्पनीले चिया, कफी र मह लगायतउच्च गुणस्तरका जडिबुटी र उत्पादनहरूको निर्यात गर्दै आएको छ । हिमालयन जडिबुटीहरूको प्राकृतिक गुण जोगाउने र दिगो कृषि अभ्यासहरूलाई प्रवद्र्धन गर्ने कम्पनीको प्रतिबद्धताले सीजीएग्रोटेकलाई स्वस्थ प्रिमियम उत्पादनहरू प्रदान गर्ने कम्पनीको रुपमा स्थापित गरेको छ । सीजीएग्रोटेक र डीएमसीसी बीचको सहकार्यले यस क्षेत्रको कृषि व्यापारमा नयाँ आयाम ल्याउने र कृषि क्षेत्रको वृद्धिलाई सहज बनाउदै नेपाल र दक्षिणपूर्वी एसियाबीचको सम्बन्धलाई अझ बलियो बनाउने अपेक्षा गरिएको छ ।
