ऊर्जा खबर
काठमाडौं । साताभर आएको भारी वर्षासँगैको भीषण बाढीले सञ्चालनमा रहेका निजी क्षेत्रका दर्जन बढी जलविद्युत आयोजनाको उत्पादन बन्द हुँदा कुलेखानी जलाशय २४ घन्टा चलेको छ । नेपाल विद्युत प्राधिकरणले विद्युतको माग र आपूर्ति व्यवस्थापन मिलाउन कुलेखानी जलाशय दिन रात चलाइरहेको हो ।
अहिले बाढीले पुर्याएको क्षतिका कारण निजी क्षेत्रका १५ भन्दा बढी जलविद्युतगृहको उत्पादन बन्द छ । बाढीले पुर्याएको क्षतिका कारण आन्तरिक उत्पादन घटेपछि जलाशयको पानी नियमितरूपमा उपयोग भइरहेको कुलेखानी–१ जलविद्युत केन्द्रका इलेक्ट्रिकल इन्चार्ज सुभास प्रसाईंले बताए ।
बाढीका कारण कालीगण्डकी ‘ए’, मर्स्याङ्दी, मध्यमर्स्याङ्दी लगायत प्राधिकरणकै जलविद्युतगृहको उत्पादन केही दिन बन्द भएकाले पनि कुलेखानी दिन रात चलाउनु पर्ने अवस्था आएको हो । अहिले कुलेखानी–१, कुलेखानी–२ र कुलेखानी–३ पूर्ण क्षमतामा चलेका छन् ।
‘एक सातादेखि कुलेखानी जलाशय दिन रात चलिरहेको छ,’ उनले ऊर्जा खबरसँग भने, ‘यसैबाट आन्तरिक माग व्यवस्थापन गरिएको छ ।’ उनले कुलेखानी जलाशयमा पानीको सतह अहिलेसम्म खासै नबढेको बताए ।
आइतबार दिउँसो गरिएको मापन अनुसार जलाशयमा १५०५ मिटर पानी छ । देशभरमा साता भरी पानी परे पनि कुलेखानी क्षेत्रमा धेरै पानी नपरेकाले जलाशयकाे सतह बढ्न नसकेको उनले बताए ।
उनले आवश्यकता परेको अवस्थामा अझै १० मिटरसम्म पानी उपयोग गर्न सकिने जानकारी दिए । जलाशयमा जम्मा हुने र उपयोग हुने पानीको अनुपात समान रहेकाले नै १५०५ मिटरमा सिमित राखेर जलाशय दिन रात चलाउन सकिएको पनि उनले बताए ।
निजी क्षेत्रका जलविद्युतगृहको उत्पादन पुनः सुचारु नहुन्जेल कुलेखानी जलाशय दैनिकरूपमा चलाउनु पर्ने देखिएको छ । जलाशयको पानी उपयोग गरी ६० मेगावाटको कुलेखानी–१ र ३२ मेगावाटको कुलेखानी–२ र १४ मेगावाटके कुलेखानी तेस्रे गरी ३ जलविद्युत केन्द्रबाट १ सय ६ मेगावाट विद्युत उत्पादन गरिन्छ । देशको विद्युत माग र आपूर्तिको सन्तुलन मिलाउने कुलेखानी एकमात्र जलाशय आयोजना हो ।
