४७ मेगावाटको दूधकोसी–४ मा सानीमा मिडिल तमोरले सेयर लगानी बढाएर ५५ प्रतिशत पुर्‍याउने 

काठमाडौँ । सानीमा मिडिल तमोर हाइड्रो पावर लिमिटेडले ४७ मेगावाटको दूधकोसी–४ जलविद्युत् आयोजनाको प्रवर्द्धक कम्पनी तमोर व्योमा हाइड्रो प्रालीमा सेयर लगानी बढाएर ५५ प्रतिशत पुर्‍याउने भएको छ । यसअघि भदौ १९ गते बसेको सानीमा मिडिल तमोर सञ्चालक समिति बैठकले उक्त कम्पनीमा ६ प्रतिशत सेयर लगानी गर्ने निर्णय गरेको थियो । कम्पनीको असोज २ गते बसेको सञ्चालक समिति बैठकले भने उक्त सेयर लगानी बढाउने निर्णय गरेको सानीमा मिडिल तमोरले जनाएको छ ।  

निर्माण–सञ्चालन–स्वामित्व ग्रहण–हस्तान्तरण (बुट) प्रारूपमा उक्त आयोजना विकास गर्न विद्युत् विकास विभागले आशयपत्र आह्वान गरेकोमा आशयपत्र बुझाएका मध्ये सानीमा मिडिल तमोर र व्योमा हाइड्रो प्रालिको संयुक्त उपक्रम (जेभी) कम्पनी छनोटमा परेको थियो । विभागले भदौ १० गते उक्त जेभी कम्पनीलाई छनोट गरेपछि कम्पनीले विशेष प्रयोजनको (एसपिभी) कम्पनी स्थापना गर्ने भएको हो । एसपिभी कम्पनीमा बाँकी लगानी व्योमा हाइड्रोले गर्ने छ । 

सानीमा मिडिल तमोर कम्पनीले ताप्लेजुङको मिक्वाखोला गाउँपालिकामा ७३ मेगावाटको मध्य तमोर जलविद्युत् केन्द्र सञ्चालन गरिरहेको छ । यो सानीमा हाइड्रो ग्रुप अन्तर्गतको कम्पनी हो । 

याे पनि 

४७ मेगावाटको दूधकोसी–४ मा सानीमा मिडिल तमोरले ६ प्रतिशत सेयर लगानी गर्ने