ऊर्जा खबर
काठमाडौं । म्याग्दी जिल्लाको घारखोलामा निर्माण भएकाे १४ मेगावाटको घारखोला जलविद्युत आयोजनाको काम सकिएकाे छ । म्याग्दी हाइड्रो पावर कम्पनीले २०७५ सालदेखि निर्माण सुरु गरेको आयोजनाको काम सकिएकाे हो ।
अहिले आयाेजनाकाे अन्तिम चरणकाे बाँकी काम भइरहेकाे आयोजना प्रमुख विनोद देवकोटाले बताए । ‘आयोजनाको काम ९९.५ प्रतिशत सम्पन्न भएको छ’, उनले ऊर्जा खबरसँग भने, ‘बाँकी काम एक साताभित्र पूरा गरी उत्पादन परीक्षण सुरु गर्ने याेजना छ ।’
आयोजनाको बाँध, विद्युतगृह र सुरुङको सिभिल संरचनाको काम पुरा गरी मुख्य उपकरण जडानको काम समेत सकिएकाे कम्पनीले जनाएको छ । आयोजनाबाट उत्पादीत विद्युत प्रवाह हुने ३३ केभी प्रसारण लाइनकाे अन्तिम चरणकाे काम भइरहेकाे छ । लाइन ८ किलाेमिटर लामाे छ । सबस्टेसनमा ट्रान्सफर्मर जडान गर्ने काम पनि भइरहेको छ ।
आयोजनाको सम्पूर्ण काम पूरा गरी एक सातापछि उत्पादन परीक्षण सुरु गर्ने जनाइएको छ । आयोजनाबाट उत्पादन हुने विद्युत ८ किलोमिटर दुरीमा रहेको नेपाल विद्युत प्राधिकरणको दाना सबस्टेनमा जोडिनेछ ।
४ वर्ष अघिदेखि निर्माण सुरु भएको आयोजनाबाट यसअघि नै विद्युत उत्पादन सुरु गर्ने तालिका थियो । तर, भौगोलिक विकटता, कोरोनाको जोखिम, युक्रेन र रसियाको युद्धले इलोक्ट्रोमेकानिकल उपकरण आयातमा प्रभावलगायत विविध कारणले तालिका सरेको देवकोटाले बताए । पछिल्लो तालिका अनुसार आयोजनाबाट २०८० जेठिभित्र विद्युत उत्पादन गर्नुपर्नेछ ।
आयोजना सम्पन्न गर्न २ अर्ब ४२ करोड रुपैया लागत अनुमान गरिएको छ । आयोजनामा ७० प्रतिशत ऋण लगानी छ । बाँकी ३० प्रतिशत स्वपुँजी लगानी रहेको छ ।
आयोजनाको थप विवरण
जिल्ला : म्याग्दी
क्षमता : १४ मेगावाट
निर्माण सुरु भएको मिति : २०७५ साल
पाइपालाइन : १२०० मिटर
सुरुङ : ३५०० मिटर
उत्पादन लक्ष्य : २०८० जेठभित्र
विद्युत जोडिने विन्दु : दाना सबस्टेसन
प्रसारण लाइन : ३३ केभी, ८ किलोमिटर
अनुमानित लागत : २ अर्ब ४२ करोड रुपैयाँ
.jpg)
