ऊर्जा खबर
.jpg)
काठमाडौं । अप्पर सोलु हाइड्रो इलेक्ट्रिक कम्पनीको सेयर आवेदन अवधि थप भएको छ । कम्पनीले सोलुखुम्बुमा निर्माण गरी सञ्चालन गरिरहेको २३.५ मेगावाटको सोलु खोला जलविद्युत आयोजना प्रभावित स्थानीयका लागि खुल्ला गरेको सेयर आवेदन अवधि थप भएको हो ।
कम्पनीले प्रभावित स्थानीयका लागि गत बैशाख २२ गतेदेखि सेयर आवेदन खुल्ला गरेको थियो । कम्पनीले सय रुपैयाँ अंकित १३ करोड ५० लाख रुपैयाँ बराबरको १३ लाख ५० हजार कित्ता सेयर निष्कासन गरेको छ ।
कम्पनीका अनुसार आयोजना प्रभावित क्षेत्र सोलुखुम्बु जिल्लाको सोलु दूधकुण्ड नगरपालिकाका सम्पूर्ण वडाका बासिन्दाका लागि सेयर निष्कासन गरिएको छ । आवेदकले न्यूनतम १० कित्तादेखि अधिकतम १ लाख कित्ता सम्म आवेदन दिन पाउनेछन् ।
कम्पनीको सेयर निष्कासन गरी बाँडफाँड गर्न एनएमबी क्यापिटल लिमिटेडलाई बिक्री प्रबन्धक तोकिएको छ । स्थानीका लागि सेयर निष्कासन गरी बाँडफाँड पछि दोस्रो चरणमा सर्वसाधारणका लागि छुट्याएको १९ लाख ५७ हजार ५ सय कित्ता सेयर निष्कासन गर्नेछ ।
कम्पनीले सोलुखुम्बुमा २३.५ मेगावाटको सोलु खोला सञ्चालन गरिरहेको छ । आयोजनाको काम २०७६ मा पूरा भएर पनि १३२ केभी सोलु कोरिडोर तयार नहुँदा ३३ केभी लाइन मार्फत वैकल्पिक रुपमा राष्ट्रिय प्रसारण प्रणालीमा जोडिएको थियो । अहिले लाइन निर्माण पूरा भएपछि आयोजना पूर्ण क्षमतामा सञ्चालनमा छ ।
.jpg)
