ऊर्जा खबर
काठमाडौं । लोअर इर्खुवा हाइड्रोपावर कम्पनीले २१ लाख कित्ता साधारण सेयर निष्कासन गर्ने भएको छ । कम्पनीले भोजपुरमा निर्माणाधीन १३ मेगावाटको तल्लो इर्खुवा खोला जलविद्युत आयोजना प्रभावित स्थानीय र सर्वसाधारणका लागि छुट्याएको सेयर निष्कासन गर्ने तयारी गरेको हो ।
सय रुपैयाँमा अंकित २१ करोड रुपैयाँ बराबरको २१ लाख कित्ता साधारण सेयर निष्कासन गर्ने तयारी गरिएको कम्पनीले जनाएको छ । कम्पनीका अनुसार सेयर निष्कासन गरी बाँडफाँड गर्न मुक्तिनाथ क्यापिटलसँग बिक्री प्रबन्धक नियुक्त सम्बन्धि सम्झौता गरिएको छ ।
सम्झौतापत्रमा कम्पनीका तर्फबाट प्रबन्ध सञ्चालक विश्वेश्वर सुवेदी र क्यापिटलको तर्फबाट प्रमुख कार्यकारी अधिकृत कबिन्द्र ध्वज जोशीले हस्ताक्षर गरे । कम्पनीले निष्कासन गर्न लागेको सेयरमध्ये १० प्रतिशत अर्थात ७ लाख कित्ता सेयर आयोजना प्रभावित स्थानीय र बाँकी २० प्रतिशत अर्थात १४ लाख कित्ता सेयर सर्वसाधारणका लागि छुट्याइएको छ ।
कम्पनीको जिल्लाको षडानन्द नगरपालिका र साल्पा सिलिचो गाउँपालिकामा निर्माणाधीन आयोजनाको काम आधा भन्दा बढी सकिएको छ ।
