ऊर्जा खबर
.jpg)
काठमाडौं । पर्याप्त बजेट नहुँदा धनकुटामा जीर्ण अवस्थामा पुगेका काठका विद्युतीय पोल फेर्न समस्या भएको छ । अर्थ मन्त्रालयले चालू आर्थिक वर्षका लागि काठका पोल फेर्ने शिर्षकमा बजेट विनियोजन नगरेकाले स्टील तथा सिमेन्टका पोल राख्न नसकिएको हो ।
प्रयोगमा आएका जीर्ण काठका पोल नफेरिँदा विद्युतीय दुर्घटनाको जोखिम बढ्दै गएको छ । १२ हजार भन्दा बढी काठका पोल भएको स्थानमा स्टिल तथा सिमेन्टका पोल राख्न बजेट मागे पनि नपाएको नेपाल विद्युत प्राधिकरण धनकुटा वितरण केन्द्र प्रमुख दीपक सापकोटाले बताए ।
‘वर्षमान पुन ऊर्जा मन्त्री हुँदा काठका पोल फेर्ने अभियान नै चलाउने भनेर प्रचार भयो,’ उनले ऊर्जा खबरसँग भने, ‘तर, अहिलेसम्म यो कामका लागि पर्याप्त बजेट पाउन सकिएको छैन । प्राधिकरणले आफ्नै स्रोतबाट पोल बदली गर्नुपर्ने बाध्यता रहेकाले बढी समय लागिरहेको छ ।’ उनले ८ हजार काठका पोल तत्कालै फेरिहाल्नु पर्ने अवस्थाका भए पनि बजेट अभावकै कारण सम्भव नभएको बताए ।
प्राधिकरणको आफ्नै स्रोतबाट चालू आर्थिक वर्षभित्र १५ सय जीर्ण पोल मात्रै फेरिँदै छन् । बाँकी साढे १० हजार जीर्ण काठका पोल फेर्न बजेट छैन । गत चैत २१ गतेको भीषण आगलागीमा परी धेरै काठका पोल डढेर नष्ट भएका छन् ।
केही काठका पोल गत शुक्रबार असिना पानी सहित आएको हावाहुरीका कारण ढलेर क्षतिग्रस्त बनेका छन् । भएका काठका पोल पनि कमजोर छन् । जसका कारण विद्युतीय दुर्घटनाको जोखिम बढेको छ ।
यो समस्या धकुटामा मात्र नभई अधिकांश पहाडी जिल्लामा छ । देशभरमा तत्कालै फेर्नुपर्ने साढे ३ लाख भन्दा बढी मक्किएका काठका विद्युतीइ पोल छन् । प्राधिकरणले मक्किएका पोल फेर्न केही वर्ष यता बजेट माग गर्दै आएको छ ।
