डाउन पिलुवा परीक्षण चरणमा, १० मेगावाट विद्युत प्रणालीमा जोडिँदै

काठमाडौं । संखुवासभाको पिलुवा खोलामा निर्माण सम्पन्न १०.३ मेगावाटको डाउन पिलुवा खोला जलविद्युत आयोजनाको विद्युत बैशाखभित्र राष्ट्रिय प्रसारण ग्रिडमा जोडिने भएको छ । रिभर फल्स पावर कम्पनीले निर्माण सम्पन्न गरेको आयोजनाको विद्युत प्रणालीमा जोडिन लागेको हो ।

आयोजनाको सबै काम पूरा भई आन्तरिक परीक्षण भइरहेकोले बैशाखभित्र उत्पादन परीक्षण सुरु गर्ने तयारी गरेको कम्पनीका अध्यक्ष सुवाश अमात्यले बताए । ‘अहिले आयोजनाको आन्तरिक परीक्षण भइरहेको छ’, उनले ऊर्जा खबरसँग भने, ‘परीक्षणको चरणमा कुनै प्राविधिक समस्या नआएमा तीन साताभित्र आयोजनाको विद्युत प्रणालीमा जोडिनेछ ।’

आयोजनाको विद्युत राष्ट्रिय प्रसारण प्रणालीमा जोडिएपछि नेपाल विद्युत प्राधिकरणलाई दुई साता निशुल्क विद्युत दिइनेछ,  त्यसपछि व्यापारीक उत्पादन सुरु हुने कम्पनीले जनाएको छ ।

आयोजनाबाट उत्पादन हुने विद्युत २२० केभी कोसी कोरिडोर प्रसारण लाइनको बानेश्वर सबस्टेसनमा जोडिनेछ । सबस्टेसनसम्मको आवश्यक साढे ३ किलोमिटर प्रसारण लाइन कम्पनी आफैले निर्माण गर्नेछ ।

प्राधिकरणसँग भएको विद्युत खरीद सम्झौता (पिपिए) अनुसार आयोजनाबाट २०७७ चैतदेखि विद्युत उत्पादन गर्नुपर्ने तालिका थियो । तर, विद्युत प्रवाह हुने कोसी कोरिडोर प्रसारण लाइन निर्माणमा भएको ढिलाई, कोरोना माहामारीले गर्दा करिब २ वर्ष ढिला गरी विद्युत उत्पादन सुरु गर्न लागिएको कम्पनीले जनाएको छ ।

आयोजना सम्पन्न गर्न १ अर्ब ८९ करोड ४० लाख रुपैयाँ लागत अनुमान गरिएको छ । आयोजनामा सिटिजन बैंकको अगुवाईमा नेपाल इन्भेष्टमेन्ट र प्रभु बैंकले ७० प्रतिशत अर्थात १ अर्ब ३२ करोड रुपैयाँ ऋण लगानी गरेका छन् । बाँकी, ३० प्रतिशत अर्थात ५७ कारोड ४० लाख रुपैयाँ स्वपूँजी छ ।

आयोजनाको थप जानकारी

आयोजनाको नाम : डाउन पिलुवा

प्रवर्द्धक कम्पनी : रिभर फल्स पावर कम्पनी लिमिटेड

क्षमता : १०.३ मेगावाट

जिल्ला : संखुवासभा

हेडरेस पाइप : २.४ किलोमिटर

सबस्टेसन : बानेश्वर

लागत : १ अर्ब ८९ करोड ४० लाख रुपैयाँ

ऋण लगानी : १ अर्ब ३२ करोड रुपैयाँ (सिटिजन बैंकको अगुवाईमा नेपाल इन्भेष्टमेन्ट र प्रभु बैंक)

स्वपूँजी लगानी : ५७ कारोड ४० लाख रुपैयाँ (३० प्रतिशत)

वार्षिक उत्पादन : ५७.६८५ गिगावाट घन्टा 

हिउँद : ७.६८५ गिगावाट घन्टा

बर्खा : ५० गिगावाट घन्टा

निर्माण सुरु : २०७६ पुस

पिपिए अनुसार उत्पादन तालिका : २०७७ चैतदेखि

नयाँ उत्पादन तालिका : २०७९ चैत (२ वर्ष ढिलो)