ऊर्जा खबर
काठमाडौँ । लमजुङ जिल्लामा ४०.२७ मेगावाटको सुपर न्यादी जलविद्युत् आयोजना निर्माण गरिरहेको सिउरी–न्यादी पावर प्रालिले निष्कासन गर्ने साधारण सेयरको प्रत्याभूति नागरिक लगानी कोषले गरिदिने भएको छ । यससम्बन्धमा कम्पनीका अध्यक्ष शैलेन्द्र गुरागाईं र कोषका कार्यकारी निर्देशक पर्वतकुमार कार्कीले सम्झौतामा हस्ताक्षर गरेका छन् ।
सिउरी–न्यादीले १०० रुपैयाँ मूल्य अंकित ३ करोड ३ लाख ६० हजार ७८४ कित्ता सेयर निष्कासन गर्न लागेको छ । उक्त सेयरको ३ अर्ब ३ करोड ६० लाख ७८ हजार ४ सय रुपैयाँ बराबरको सेयर कोषले प्रत्याभूति गरिदिने भएको छ ।
लमजुङको हिमाली क्षेत्रमा निर्माण भएको सुपर न्यादीको अहिलेसम्म ७० प्रतिशत निर्माण पूरा भएको आयोजना संयोजक यज्ञप्रसाद सुवेदीले जानकारी दिएका छन् । करिब ७ किलोमिटर मुख्य सुरुङ निर्माण गर्नुपर्नेमा अहिलेसम्म ६ किलोमिटरको काम पूरा भइसकेको छ । संशोधित तालिका अनुसार २०८२ असारसम्म आयोजनाबाट विद्युत् उत्पादन गर्ने लक्ष्य राखिएको छ ।
नेपाल विद्युत् प्राधिकरणसँग भएको विद्युत् खरिद सम्झौता (पिपिए) अनुसार आयोजनाबाट २०८१ असारभित्र उत्पादन सुरु गर्ने तालिका छ । आयोजना जी एन्ड जी प्रालिले निर्माण गरिरहेको छ । ७ अर्ब रुपैयाँ लागत अनुमान आयोजनामा एनएमबी बैंकको अगुवाईमा ६ वित्तीय संस्थाले ५ अर्ब २५ करोड रुपैयाँ (७५ प्रतिशत) ऋण लगानी र १ अर्ब ७५ करोड रुपैयाँ (२५ प्रतिशत) स्वपुँजी लगानी रहेको छ ।
आयोजनाबाट वार्षिक २३५.७६ गिगावाट घन्टा (२३ करोड ५७ लाख ६० हजार युनिट) विद्युत् उत्पादन हुनेछ । उत्पादित विद्युत आयोजनास्थलदेखि ११ किलोमिटर टाढाको १३२ केभी तारीकुना खुदी सबस्टेसनमा जोडिने छ । सबस्टेसनसम्मको लाइन कम्पनी आफैँले निर्माण गर्ने योजना छ ।
