ऊर्जा खबर
.jpg)
काठमाडाैं । इण्डियन आयल कर्पोरेशन (आइओसी) ले नेपाललाई बिक्री गर्ने डिजेलको मूल्य प्रतिलिटर ३ रुपैयाँ घटाएको छ । तर, देशभित्र नेपाल आयल निगमले मूल्य नघटाउने जनाएको छ ।
निगमका अनुसार भारतीय बिक्रेताले सोमबार पठाएको नयाँ मूल्य सूचीमा डिजेलको मूल्य समायोजन गरेको हो । यसैगरी, हवाई इन्धनको मूल्य पनि घटाइएको छ । मंगलबार जारी प्रेस विज्ञप्तीमा निगमले नयाँ मूल्य सूची अनुसार आगामी १५ दिनमा रु ५३ करोड नाफा गर्ने प्रक्षेपण गरेको छ ।
एक महिनामा निगमको नाफा एक अर्ब नाघ्ने छ । तर निगमले आन्तरिक बजारमा पेट्रोलियम पदार्थको मूल्य नघटाउने जनाएको छ । निगमका अनुसार आइओसी र सरकारलाई तिर्न बाँकी कूल ऋण बक्यौता १७ अर्ब ३० करोड रुपैयाँ रहेको छ ।
भारतीय बिक्रेताबाट प्राप्त सूचीमा डिजलको मूल्य घटे पनि पेट्रोलको मूल्य भने प्रतिलिटर २ बढेर आएको छ । नयाँ मूल्यमा निगमलाई एलपी ग्यासमा ३५९.५० रुपैयाँ प्रतिसिलिण्डर घाटा रहेको जनाइएको छ ।
