ऊर्जा खबर
काठमाडौं । २.४ मेगावाटकाे माथिल्लो स्याङ्गे खोला जलविद्युत आयोजना अबकाे साता दिनमा राष्ट्रिय प्रसारण प्रणालीमा जाेडिने भएकाे छ । लमजुङमा निर्माण सम्पन्न भएकाे जलविद्युत आयोजनाबाट विद्युत उत्पादन सुरु हुन लागेकाे हाे ।
अप्पर स्याङ्गे हाइड्रो पावर कम्पनीले निर्माण सुरु गरेकाे ४ वर्षमा आयोजना सम्पन्न गरेकाे हाे । २०७४ सालदेखि निर्माण सुरु भएको आयोजनाको निर्माण सकिएर अहिले सिभिल संरचना तथा जडान भएका उपकरणहरूकाे आन्तरिक परीक्षण भइरहेकाे कम्पनीले जनाएकाे छ ।
कम्पनीका अनुसार आयोजनामा जडान भएको हाइड्रोमेकानिकल, इलेक्ट्रोमेकानिकल उपकरण ठिक छन् कि छैनन् भनी परीक्षण सुरु गरिएकाे हाे । संरचना तथा उपकरणकाे परीक्षणकाे चरण पूरा भएपछि आयोजनाबाट परीक्षण उत्पादन सुरु गर्ने तयारी छ ।
आयोजनाबाट उत्पादन भएकाे विद्युत प्रसारण प्रणालीमा जोडिएपछि २ सातासम्म परीक्षण उत्पादन चल्नेछ । परीक्षण उत्पादनकाे चरण पूरा गरेर व्यापारिक उत्पादन सुरु गरिने कम्पनीले जनाएकाे छ । आयोजनाको विद्युत ३३ केभी प्रसारण लाइन मार्फत १२ किलोमिटर दुरीमा रहेको खुदी सबस्टेसनमा जोडिनेछ ।
सबस्टेसम्मको आवश्यक प्रसारण लाइन कम्पनी आफैले निर्माण गरेको हो । आयोजनाबाट वार्षिक १४.६१६ गिगावाट घन्टा विद्युत उत्पादन हुनेछ । हिउँदमा २.८६८ गिगावाट घन्टा र बर्खामा ११.७४८ गिगावाट घण्टा विद्युत उत्पादन हुनेछ ।
आयोजनाबाट २०७६ जेठभित्रनै विद्युत उत्पादन सुरु गर्ने तालिका भए पनि विविध कारणले गर्दा ढिला भएको हो । आयोजना ४६ करोड १० लाख ८४ हजार रुपैयाँमा सम्पन्न भएको छ ।
