ऊर्जा खबर
काठमाडौं । स्वेतगंगा हाइड्रोपावर एन्ड कन्स्ट्रक्सन लिमिटेडले साधारण सेयर निष्कासन गर्ने भएको छ । कम्पनीले रामेछापमा निर्माणाधीन २८.१ मेगावाटको तल्लो लिखु खोला जलविद्युत आयोजना प्रभावित स्थानीय र सर्वसाधारणका लागि छुट्याएको साधारण सेयर निष्कासन गर्न लागेको हो ।
कम्पनीले सेयर निष्कासन गरी बाँडफाँड गर्न सानिमा क्यापिटललाई बिक्री प्रबन्धक नियुक्त गरेको छ । नियुक्ती सम्बन्धी सम्झौतापत्रमा सानिमा क्यापिटलको तर्फबाट प्रमुख कार्यकारी अधिकृत भिष्मराज चालिसे र श्वेत–गंगा हाइड्रोपावरको तर्फबाट कार्यकारी सञ्चालक डा. सुवर्ण दास श्रेष्ठले हस्ताक्षर गरेका छन् ।
कम्पनीले आयोजना प्रभावित स्थानीय, सर्वसाधारण तथा कर्मचारीलाई ४७ करोड ७९ लाख रुपैयाँ बराबरको ४७ लाख ७९ हजार कित्ता सेयर बिक्री गर्न लागेको हो । उक्त सेयर कम्पनीको जारी पुँजी १ अर्ब ५९ करोड ३० लाख रुपैयाँको ३०% हो ।
कम्पनीले सेयर निष्कासन अनुमतिका लागि नेपाल धितोपत्र बोर्डमा आवेदन दिएको छ । बोर्डबाट आवेदन दिने लगतै सेयर निष्कासन गरी बाँडफाँड गरिने कम्पनीले जनाएको छ ।
कम्पनीले निर्माण गरीरहेको आयोजनाको काम आधा भन्दा बढी सकिएको छ । आयोजना सम्पन्न भएपछि उत्पादन हुने विद्युत नेपाल विद्युत प्राधिकरणको प्रस्तावित १३२ केभी न्यू खिम्ती सव–स्टेसनमार्फत राष्ट्रिय प्रसारण प्रणालीमा जोड्ने योजना रहेको छ ।
