ऊर्जा खबर
काठमाडौं । न्यादी हाइड्रो पावर कम्पनीको सेयर बाँडफाँड भएको छ । कम्पनीको लमजुङमा निर्माणाधीन ३० मेगावाटको न्यादी जलविद्युत आयोजनाको सर्वसाधारणका लागि गत असोज १५ गतेदेखि १९ गतेसम्म निष्कासन गरेको सेयर बाँडफाँड भएको हो ।
कम्पनीको सेयरधनी बन्न आवेदन दिएका मध्ये २ लाख ९ हजार २५० मात्र गोलाप्रथाबाट १० कित्ता सेयर पाएको बिक्री प्रबन्धक ग्लोबल आइएमई क्यापिटल लिमिटेडले जनाएको छ । कम्पनीको सेयरधनी बन्न २३ लाख ५७ हजार १६६ जनाले २ करोड ९४ लाख ७७ हजार ६५० कित्ता लागि आवेदन दिएका थिए । यो माग गरिएको भन्दा करिब १४ गुणा बढी हो ।
कम्पनीले गत असोज १५ गतेदेखि सर्वसाधारणका लागि २२ करोड ५० लाख रुपैयाँ मूल्यको सेयरको बिक्री खुल्ला गरेको थियो । साधारण सेयरको ५ प्रतिशत हुन आउने १ लाख १२ हजार ५ सय कित्ता सेयर सामूहिक लगानी कोषका लागि तथा २ प्रतिशत हुन आउने ४५ हजार कित्ता सेयर कम्पनीमा कार्यरत कर्मचारीका लागि छुट्याइएको थियो । बाँकी २० लाख ९२ हजार ५ सय कित्ताका लागि सर्वसाधारणका लागि थियो ।
पहिलो चरणमा स्थानीयबासीका लागि १८ करोड रुपैयाँ मूल्यको १८ लाख कित्ता सेयर निष्कासन गरी बाँडफाँड गरिएको छ । सेयर भर्ने सबै स्थानीयबासीले कम्पनीको सेयर पाएका छन् ।
यो बुटवल पावर कम्पनी (बिपिसी) को सहायक कम्पनी हो । कम्पनीले लगानी गरेको न्यादी जलविद्युत आयोजना निर्माणको अन्तिम चरणमा छ । सिभिल संरचना निर्माण कार्य पूरा भइसकेको छ ।
