ऊर्जा खबर
काठमाडौं । पछिल्लो समय निजी ऊर्जा उत्पादहरूको आकर्षण सौर्य विद्युत उत्पादनतर्फ बढ्दै गएसँगै यसबाट उत्पादित विद्युतको परिणाम पनि थपिँदै गएको छ । जलविद्युत भन्दा कम लागत तथा छोटो समयमा निर्माण गर्न सकिने हुँदा उत्पादकहरूको आकर्षण सौर्य ऊर्जातर्फ बढ्दै गएको हो ।
ऊर्जा उत्पादहकहरूको आकर्षण बढ्दै गएसँगै ७०७.६ मेगावाटको सौर्य आयोजनालाई अध्ययन अनुमतिपत्र वितरण गरेकाे विद्युत विकास विभागले जनाएको छ । विभागका अनुसार विद्युत उत्पादनका लागि उक्त क्षमताका ४० सौर्य आयोजनालाई अध्ययन अनुमतिपत्र दिइएको हो ।
अध्ययन अनुमति पाएका आयोजनाहरूमा १ मेगावाटदेखि २५० मेगावाटसम्मका रहेका छन् । अनुमतिपत्र पाएका आयोजनाहरूमध्ये सबभन्दा ठुलो २५० मेगावाटको कोहलपुर–बानगंगा र सबभन्दा सानो १.२ मेगावाटको बिरेन्द्रनगर सुर्खेत सौर्य आयोजना रहेको छ ।
यसैगरी, ४० मेगावाटको अत्तरिया, भूरीगाउँ र कोहलपुर सौर्य आयोजनाले अनुमतिपत्र पाएको विभागको तथ्यांकमा उल्लेख छ । साथै, ३० मेगावाटको पहलमानपुर, २५ मेगावाटको नेपालगञ्ज र गुलरिया सौर्य आयोजनाले अनुमतिपत्र पाएको छ ।
१५ मेगावाटको धारामनगर सोलार फार्म–२ लगायत अन्य ३१ सौर्य आयोजनालाई अध्ययन अनुमतिपत्र दिएकाे विभागले जनाएकाे छ । हालसम्ममा सौर्य आयोजनाको जडित क्षमता झन्डै ९० मेगावाट पुगेको छ । निजी क्षेत्रबाट ६१ मेगावाट र प्राधिकरणको तर्फबाट २६ मेगावाट सौर्य आयोजना प्रणालीमा जोडिएको छ ।
