प्रशासनको निर्देशनपछि भरतपुर वितरण केन्द्रको महसुल काउन्टर बन्द

काठमाडौं । जिल्ला प्रशासन कार्यालय चितवको निर्देशनपछि नेपाल विद्युत प्राधिकरण भरतपुर वितरण केन्द्रको विद्युत महसुल संकलन काउन्टर बन्द भएको छ । जिल्लामा कोरोना (कोभिड–१९) को नयाँ भेरियन्टको तीव्र गतिमा बढेको भन्दै महसुल काउन्टर पनि नखोल्न निर्देशन आएपछि बन्द गरिएको हो ।

अब अर्को आदेश नहुन्जेलसम्मका लागि विद्युत महसुल काउन्टर नखुल्ने वितरण केन्द्र प्रमुख राजीव सिंहले बताए । वितरण केन्द्रले यसअघि बैंक खुल्ने दिन सातामा आइतबार, मंगलबार र बिहीबार महसुल काउन्टर पनि खुलाउने निर्णय गरेको थियो ।

‘हामीले बैंक खुल्ने दिनअनुसार नै महसुल काउन्टर पनि बिहान ८ देखि १२ बजेसम्म साताको ३ दिन खुलाएका थियौं,’ उनले भने, ‘जिल्ला प्रशासन कार्यालयबाट नखोल्न् भन्ने निर्देशन आएपछि फेरि बन्द गर्यौं ।’ उनले महसुल काउन्टर बन्द भए पनि अनलाइनमार्फत घरबाटै विद्युत महसुल भुक्तानी गर्न ग्राहकसमक्ष आग्रह गरे ।

वितरण केन्द्रले घरायसी ग्राहकको घर–घरमा गएर मिटर रिडिङ गर्ने कार्य समेत बन्द गरेको छ । ग्राहकबाट बैशाख महिनामा खपत भएको युनिटलाई नै आधार मानेर बिल काट्ने गरी मिटर रिडिङ कार्य बन्द गरिएको हो । थ्रीफेज, टिओडी र औद्योगिक ग्राहकको मिटर रिडिङ कार्य भने यथावत राखिएको छ ।