माथिल्लो तमोरको पिपिए निर्धारण गर्न सार्वजनिक सुनुवाई हुँदै

काठमाडौं । विद्युत नियमन आयोगले २५५.२८१ मेगावाटको माथिल्लो तमोर जलविद्युत आयोजनाबाट उत्पादन हुने विद्युत खरिदबिक्री सम्झौता (पीपीए) दर निर्धारण गर्न सार्वजनिक सुनुवाई गर्ने भएको छ । आयाेगले तमोर सानीमा इनर्जी प्रा.लि.द्वारा प्रवद्र्धित आयोजनाको विद्युत खरिद सम्झौतामा सहमतिको लागि पेश भएको निवेदन माथि छलफल गर्न सार्वजनिक सुनुवाई गर्न लागेको हो । 

प्रदेश नम्बर–१ ताप्लेजुङ्ग जिल्लाको फक्ताङलुङ्ग गाउँपालिका र फुङ्गलिङ्ग नगरपालिकामा निर्माण हुने माथिल्लो तमोर जलविद्युत आयोजनाबाट उत्पादित विद्युतको खरिदबिक्री सम्झौता (पीपीए) गर्न सहमतिका लागि नेपाल विद्युत प्राधिकरणले आयोग समक्ष निवेदन पेश गरेको थियो । 

आयोगले ३० गते (बिहीबार) दिउँसो २ बजे सानो गौचारण स्थित विद्युत विकास विभागको सभाहलमा सरोकारवाला निकाय तथा व्यक्तिहरुलाई कार्यक्रममा सहभागी हुन आह्वान गरेको छ ।