ऊर्जा खबर
काठमाडौँ । स्वतन्त्र ऊर्जा उत्पादकहरूको संस्था, नेपाल (इपान) का नवनिर्वाचित अध्यक्ष मोहनकुमार डाँगीले विगतका सबै तिक्तताहरूलाई बिर्सेर अब ऊर्जा उद्यमीहरू एक ढिक्का भई अगाडि बढ्नुपर्ने बताएका छन् । इपान सचिवालयमा बुधबार आयोजित नवनिर्वाचित कार्यसमितिका पदाधिकारीहरूको पदबहाली कार्यक्रममा उनले यस्तो बताएका हुन् ।
पूर्वअध्यक्षहरू शैलेन्द्र गुरागाईं, कृष्णप्रसाद आचार्य र गणेश कार्कीसँग निकट रहेर काम गरेको अनुभव सुनाउँदै उनले हिजो विद्रोह गरेका साथीहरू आज एकै ठाउँमा उभिनु आफ्नो र कार्यसमितिका लागि अवसर तथा चुनौती दुवै भएको उल्लेख गरे । वर्तमान मजबुत सरकारसँग मिलेर नीति–निर्माणमा सहकार्य गर्दै अघि बढ्ने प्रतिबद्धता व्यक्त गरे । सबैको साथ र सहयोग प्राप्त हुने अपेक्षा व्यक्त गरेका उनले कार्यसमितिको दोस्रो बैठकबाट पदाधिकारी तथा सदस्यहरूको जिम्मेवारी बाँडफाँट गरिने जानकारी दिए ।
यसैगरी, कार्यक्रममा इपानका निवर्तमान अध्यक्ष गणेश कार्कीले नवनिर्वाचित कार्यसमितिलाई ऊर्जा बजारले निकै सकारात्मक रूपमा हेरिरहेको भन्दै खुसी व्यक्त गरे । इपानको नेतृत्वमा अब देशको समग्र ऊर्जा क्षेत्र कसरी अघि बढ्छ भन्ने कुरा आम चासोको विषय बनेको र यसले ऊर्जा विकासलाई अझ गति दिने आशा सरकारले समेत राखेको उनको भनाइ थियो । आगामी १० वर्षमा ३० हजार मेगावाट विद्युत् उत्पादन क्षमता पुर्याउने सरकारको लक्ष्य पूरा गर्नका लागि नीतिगत अवरोधहरू हटाउनुपर्नेमा जोड दिँदै कार्कीले ऊर्जा उद्यमीहरू एक्ला–एक्लै हिँडे बाटो बिराउने र लक्ष्यमा पुग्न नसकिने भएकाले सम्पूर्ण उद्यमी र पदाधिकारीहरू एउटै आवाज बोकेर एउटै मार्गमा अघि बढ्नुपर्ने धारणा राखे ।
त्यस्तै, नवनिर्वाचित कार्यसमितिका वरिष्ठ उपाध्यक्ष उत्तम भ्लोन लामाले संस्थाको ‘भिजन २०२९’ अनुसार कार्यसमितिका सबै सदस्यहरूको क्षमताका आधारमा जिम्मेवारी बाँडफाँट गरेर अगाडि बढ्ने बताए । कुरा मात्र गरेर उपलब्धि हासिल नहुने स्पष्ट पार्दै उनले काम गरेर देखाउन नसके यस जम्बो टोलीको कुनै अर्थ नरहने भन्दै परिणाममुखी काम गर्नुपर्नेमा जोड दिएका छन् ।
