हिमालयन ईनर्जीले  ३ मेगावाटको सागु खोला निर्माण गर्ने

काठमाडौँ । हिमालयन ईनर्जी प्रालिले दोलखाको कालिन्चोक गाँउपालिकामा ३ मेगावाटको साना जलविद्युत् आयोजना निर्माण गर्ने भएको छ । कम्पनीले आयोजना निर्माण गर्न अनुमतिपत्र माग्दै विद्युत् विकास विभागमा आवेदन दिएको छ ।

कम्पनीका अनुसार आयोजना अघि बढाउन ऊर्जा, जलस्रोत तथा सिँचाइ मन्त्रालयबाट २०८० माघ २९ गते प्रारम्भिक वातावरणीय मूल्यांकन (आइइई) स्वीकृत भइसकेको छ । आयोजना निर्माणका क्रममा कुनै असर पर्ने देखिए सूचना प्रकाशित भएको ३५ दिनभित्र विभाग तथा सम्बन्धित कार्यालयमा राय–सुझाव पेश गर्न सूचित गरिएको छ ।

आयोजनाको विद्युत्गृह लगायत सम्पूर्ण संरचनाहरू कालिन्चोक गाउँपालिका–१ भएर बग्ने ३ वटा खोला (बुदेखानी, भूमिथान र सिखर्जुन) मिसिएर बनेको सागु खोलाको बायाँ किनारमा रहने जनाइएको छ । आयोजनाबाट वार्षिक १७.४७ गिगावाट घन्टा ऊर्जा उत्पादन हुने अध्ययनले देखाएको छ ।

आयोजनाबाट उत्पादित विद्युत् ३३ केभी प्रसारण लाइनमार्फत करिब १२ किलोमिटर टाढाको नेपाल विद्युत् प्राधिकरणको सिंगटी सबस्टेसनमा जोडी राष्ट्रिय प्रसारण लाइन प्रवाह हुनेछ । आयोजनाको बाँधस्थलभन्दा तल तथा विद्युत्गृहभन्दा माथिको खण्डका जीवजन्तु, जलचर तथा बोटबिरूवाहरूका लागि आवश्यक न्यूनतम पानी आइइई प्रतिवेदन अनुसार कायम गरिने कम्पनीले प्रतिबद्धता जनाएको छ । आयोजनाबाट २०८२ सालभित्र विद्युत् उत्पादन गर्ने लक्ष्य राखिएको छ ।