ऊर्जा खबर
काठमाडौं । राष्ट्रिय प्रसारण ग्रिड कम्पनी लिमिटेड र नेपाल विद्युत् प्राकिरणबीच ‘ट्रान्समिसन इन्टर–कनेक्सन एग्रिमेन्ट’ भएको छ । यसबाट प्राधिकरणसँग कनेक्सन एग्रिमेन्ट (जडान सम्झौता) गरेका विद्युत् आयोजनाले कम्पनीले निर्माण गरेका प्रसारण लाइनमा समेत विद्युत् प्रवाह गर्न पाउने बाटो खुला भएको छ ।
सम्झौतामा कम्पनीका प्रमुख कार्यकारी अधिकृत नेत्रप्रसाद ज्ञवाली र प्राधिकरणका कार्यकारी निर्देशक कुलमान घिसिङले हस्ताक्षर गरेका छन् । यसअघि कम्पनी र प्राधिकरणले आ–आफ्नो तरिकाले काम गरेको र त्यसमा अन्तरआवद्धता थिएन, जसको कारण निजी क्षेत्रले विद्युत् खरिद सम्झौता (पिपिए) गरेका आयोजना प्राधिकरणको संरचनामा मात्र जडान गर्न पाइन्थ्यो ।
उक्त सम्झौतापछि कम्पनीले देशका विभिन्न ठाउँमा निर्माण गरिरहेका प्रसारण संरचनामा प्राधिकरणसँग जडान सम्झौता गरी विद्युत् प्रवाह गर्न सकिने जनाइएको छ । यसबाट प्रसारण क्षेत्रमा विविधिकरण हुनुका साथै विद्युत् क्षेत्रको पुनर्संचनाको सुरुवात पनि भएको छ । साथै, कम्पनीले प्रसारण लाइन निर्माण गरिरहेका नदी बेसिनमा अर्को समानान्तर लाइनको खाँचो पनि अन्त्य हुने भएको छ ।
यो सम्झौताले प्रसारण लाइन निर्माणमा उत्पन्न हुने वातावरणीय समस्या तथा असर पनि न्यूनिकरण हुनेछ । विद्युत् विकासका लागि यो एउटा कोसे ढुंगा पनि भएको छ । यसले, आगामी दिनमा कम्पनी र प्राधिकरणबीच एकता हुने आधारलाई पनि बल पुर्याएको छ । प्रसारण लाइन विकास एउटै निकायबाट हुनु देशका लागि अपरिहार्य भइसकेको छ ।
