ऊर्जा खबर
काठमाडौं । चिर्खुवा हाइड्रो पावर कम्पनीले १२ लाख कित्ता साधारण सेयर निष्कासन गर्ने भएको छ । कम्पनीले भोजपुरमा निर्माणाधीन ४.७ मेगावाटको माथिल्लो चिर्खुवा खाेला जलविद्युत आयोजनाको सर्वसाधारणका लागि छुट्याएकाे सेयर निष्कासन गर्न लागेको हो ।
प्रतिकित्ता सय रुपैयाँमा अंकित १२ करोड रुपैयाँ बराबरको साधारण सेयर निष्कासन गर्ने तयारी सुरु गरेको कम्पनीले जनाएको छ । कम्पनीका अनुसार सेयर निष्कासन गरी बाँडफाँड गर्न आरबिबी मर्चेन्ट बैंकिङलाई बिक्री प्रबन्धक नियुक्त गरिएको छ ।
बिक्री प्रबन्धक ताेकिएकाले अब सेयर निष्कासनकाे प्रक्रिया सुरु हुने कम्पनीले जनाएकाे छ । अब बिक्री प्रबन्धकले आयोजना प्रभावित क्षेत्रका स्थानीय र सर्वसाधारणका लागि सेयर निष्कासन गर्ने अनुमति लिन नेपाल धिताेपत्र बाेर्डमा आवेदन दिनेछ ।
बोर्डबाट अनुमति पाएपछि सेयर निष्कासन गरी बाँडफाँड गरिनेछ । कम्पनीले भोजपुरको षडानन्द नगरपालिकामा ४.७ मेगावाटको माथिल्लो चिर्खुवा जलविद्युत आयोजना निर्माण गरिरहेको छ ।
