ऊर्जा खबर
काठमाडौं । युनाइटेड मोदी हाइड्रो पावर लिमिटेडको ७ प्रतिशत बोनस सेयर र नगद लाभांस पारित भएको छ । कम्पनीको बिहीबार (चैत २३ गते) सम्पन्न भएको ९औं वार्षिक साधारणसभाले आर्थिक वर्ष (आव) २०७८/७९ को नाफाबाट सेयरधनीहरूका लागि वितरण गर्न प्रस्ताव गरिएको प्रतिफल पारित गरेकाे हो ।
चुक्ता पूँजी साढे १ अर्ब रुपैयाँको ७ प्रतिशत बोनस सेयर र कर प्रयोजनका लागि ०.३६ प्रतिशत नगद लाभांस वितरण गर्न साधारणसभाबाट स्वीकृति भएको कम्पनीका अध्यक्ष नरेन्द्र बल्लभ पन्तले बताए । उनका अनुसार अब छिट्टै सेयरधनीहरूलाई नगद लाभांस र बोनस सेयर वितरण गरिनेछ ।
सभामा उपस्थित सेयरधनीहरू बोनस सेयर र कर प्रयोजनका लागि नगद लाभांस वितरण गरेकोमा आभार प्रकट गर्दै अर्को वर्ष कम्तिमा पनि १० प्रतिशत प्रतिफत वितरण गर्न आग्रह गरे ।
सभाले सञ्चालक समितिको प्रतिवेदन, लेखापरीक्षकको प्रतिवेदन सहित आव को वित्तिय विवरणहरू, लेखापरीक्षण समितिको सिफारिस अनुसार आव २०७९/८० का लागि लेखापरीक्षकको नियुक्ति र निजको पारिश्रमिक निर्धारण गर्ने, तथा सञ्चालक समितिको सिफारिसअनुसार एकजना स्वतन्त्र सञ्चालक नियुक्ति गर्ने लगायतका सबै प्रस्तावहरू पारित गरेको छ ।
कम्पनीको पुस २९ गते बसेको सञ्चालक समितिको बैंठकले यो लाभांश वितरण गर्ने निर्णय गरेको थियो । कम्पनीको १० मेगावाटको तल्लो मोदी–१ जलविद्युत आयोजना सञ्चालनमा छ ।
