ऊर्जा खबर
काठमाडौँ । ‘नवीकरणीय ऊर्जा तथा ऊर्जा दक्षतासम्बन्धी विधेयक, २०८१’ राष्ट्रियसभाबाट पारित भएको छ । राष्ट्रियसभाको आइतबार (फागुन ४ गते) बसेको बैठकबाट सर्वसम्मतले विधेयक पारित भएको हो ।
ऊर्जा, जलस्रोत तथा सिँचाइ मन्त्री दीपक खड्काले ‘विधायन व्यवस्थापन समितिको प्रतिवेदनसहित नवीकरणीय ऊर्जा तथा ऊर्जा दक्षतासम्बन्धी विधेयक, २०८१ पारित गरियोस्’ भन्ने प्रस्ताव प्रस्तुत गरेका थिए । यसपछि, राष्ट्रियसभाका अध्यक्ष नारायणप्रसाद दाहालले विधेयकमाथि निर्णयार्थ प्रस्तुत गर्दै सर्वसम्मतिले पारित भएको घोषणा गरे ।
पूर्व ऊर्जा, जलस्रोत तथा सिँचाइ मन्त्री शक्तिबहादुर बस्नेतले गत जेठ ३१ गते उक्त विधेयक राष्ट्रियसभामा दर्ता गराएका थिए । असार १० गते यसबारे सामान्य र १७ गते दफावार छलफल भएको थियो । यसपछि माघ १८ गते विधायन समितिमा छलफलका लागि पेश भएको थियो ।
उक्त विधेयक प्रतिनिधिसभाबाट पारित भएपछि वैकल्पिक ऊर्जा प्रवर्द्धन केन्द्रको पुनर्संरचनादेखि उसले गर्ने काम, कर्तव्य र अधिकारलगायत विषयसमेत संशोधन हुनेछन् । केन्द्रबाट हुँदै आएका काम चाँडो टुंग्याएर नयाँ संरचना अनुसार जानुपर्ने भन्दै अहिले थाति रहेका योजना पूरा गरिँदैछ ।
मन्त्रालयको जिम्मेवारीमा आएपछि मन्त्री खड्काले पुराना र थाति रहेका नीतिगत कामहरू धमाधम टुङ्ग्याउँदै लगेका छन्, जुन अघिल्ला मन्त्रीहरूले काम सुरु गरे पनि टुंगोमा पुर्याउन सकेका थिएनन् । खड्काले नै पूर्वमन्त्री बस्नेतले अगाडि बढाएको ‘ऊर्जा विकास मार्गचित्र, २०८१’ जारी गर्न सफल भए ।
यसैगरी, बंगलादेशमा ४० मेगावाट विद्युत् निर्यात गर्ने सम्झौता होस् वा भारसँगको द्विपक्षीय वार्तामा विद्युत् आयात–निर्यातको दायरा फराकिलो बनाउनुका साथै आन्तरिक नीतिगत कामलाई उनले द्रुत गतिमा टुंग्याएका छन् । लामो समयदेखि संसदमा विचाराधीन रहेको नयाँ विद्युत् विधेयकसमेत आफ्नै कार्यकालमा पारित गराउन उनले सक्रियताका साथ पहल गरिरहेको बताउँदै आएका छन् ।
.jpg)
