ऊर्जा खबर
काठमाडौं । पाँचथरमा निर्माणाधीन इङ्वाखोला जलविद्युत आयोजनाको ९.७ मेगावाट विद्युत राष्ट्रिय प्रसारण प्रणालीमा थपिने भएको छ । इङ्वाखोला हाइड्रो पावर लिमिटेडले निर्माण अन्तिम चरणमा पुर्याएको आयोजनाको विद्युत प्रसारण प्रणालीमा थपिन लागेको हो ।
८५ प्रतिशत निर्माण पूरा भएको आयोजनाको विद्युत आगामी २०८० बैशाखभित्र राष्ट्रिय प्रणालीमा जोड्ने लक्ष्य रहेको कम्पनी सचिव गोकुल पाण्डेले बताए । आयोजनाको विद्युत अबको ३ महिनाभित्र राष्ट्रिय प्रसारण प्रणालीमा जोडिन लागेको छ ।
२०७८ भदौ २३ गतेदेखि निर्माण थालिएको आयोजना २० महिनामा निर्माण सम्पन्न हुन लागेको हो । आयोजनाको पाइपलाइन र प्राविधिक तर्फको अन्तिम चरणको काम भइरहेको छ ।
आयोजनाको बाँध (हेडबक्स) पाँचथरको याङवरक गाउँपालिका–२ सेरेजामा छ । बाँध क्षेत्रको काम सकिएको छ । ४.४० किलोमिटर फलामे ‘हेडरेस’ पाइपलाइन र २७८ मिटर ‘सर्ज’ पाइपमार्फत खोलाको पानी याङवरक–३ ओयामको आँपडाँडामा रहेको विद्युतगृहमा ल्याएर विद्युत उत्पादन गरिनेछ । पाइपलाइनको अन्तिम चरणको काम भइरहेको छ ।
यस्तै, विद्युतगृहको सिभिल संरचनाको काम पूरा गरी उपकरण जडानको काम भइरहेको पाण्डेले बताए । आयोजनाको विद्युत जोडिने १६ किलोमिटर लामो ३३ केभी लाइनको काम भइरहेको छ । यो लाइनको काम पनि चैतभित्र सकिने कम्पनीले जनाएको छ ।
आयोजनाको सबै काम पूरा गरेर बैशाखभित्र उत्पादन सुरु गर्ने योजना रहेको पाण्डेले बताए । आयोजना सम्पन्न गर्न १ अर्ब ९५ करोड रुपैयाँको लागत अनुमान गरिएको छ । आयोजनामा ३० प्रतिशत स्वपूँजी र ७० प्रतिशत ऋण लगानी छ । आयोजनामा बैंक अफ काठमाण्डौं (मर्जरपछि हाल ग्लोबल आइएमई बैंक) को छ ।
आयोजनाको विवरण
जिल्ला : ताप्लेजुङ र पाँचथर
क्षमता : ९.७ मेगावाट
वार्षिक सरदर उत्पादन : ६५.७३ गिगावाट घन्टा (हिउँदमा २४.९ गिगावाट घन्टा र बर्खामा ४०.८३ गिगावाट घन्टा)
निर्माण सुरु भएको मिति : २०७८ भदौ निर्माण अवधि : २० महिना
पाइपलाइन : ४.४० किलोमिटर
उत्पादन मिति (लक्ष्य) ः २०८० बैशाखभित्र
विद्युत जोडिने विन्दु : अमरपुर सबस्टेसन
प्रसारण लाइन : ३३ केभी (१६ किलोमिटर)
लागत : १ अर्ब ९५ करोड (७० प्रतिशत ऋण र ३० प्रतिशत स्वपूँजी)
.jpg)
