ऊर्जा खबर
काठमाडौं । अरुण भ्याली हाइड्रो पावर डेभलपमेन्ट कम्पनीको हकप्रद सेयर नेपाल स्टक एक्सचेञ्ज (नेप्से) मा सूचीकृत भएको छ । कम्पनीको हकप्रद सेयर आज (शुक्रबार) नेप्सेमा सूचीकृत भएको हो ।
सेयरधनीका लागि चुक्ता पुँजीको १ः०५ (५० प्रतिशत) सेयर निष्कासन गरिएको हकप्रद सेयर सूचिकृत भएको कम्पनीले जनाएको छ । कम्पनीका अनुसार ५२ करोड ४१ लाख १९ हजार ७ सय रुपैयाँ बराबरको ५२ लाख ४१ हजार १ सय ९७ कित्ता सेयर सूचिकृत भएको छ ।
गत बैशाख ६ गते (सोमबार) बाट निर्माणाधीन १० मेगावाटको काबेली ‘बी’–१ क्यासकेड जलविद्युत आयोजनामा लगानी जुटाउन सबै सेयरधनीका लागि निष्कासन गरेको हकप्रद सेयर आवेदन जेठ २ गते बन्द भएको थियो ।
कम्पनीको लगानीमा पाँचथरमा निर्माणाधीन आयोजना ६० प्रतिशत बढी सकिएको छ । निर्माणाधीन आयोजनाबाट २०७८ मंसिरदेखि विद्युत उत्पादन गर्ने लक्ष्य छ ।
आयोजना सम्पन्न गर्न २ अर्ब रुपैयाँ लागत अनुमान गरिएको छ । जसमा १ अर्ब ४० करोड रुपैयाँ बैंक अफ काठमाडौं र कुमारी बैंकको ऋण लगानी छ । बाँकी ६० करोड रुपैयाँ स्वपुँजी लगानी छ । यो आयोजना सम्पन्न भएपछि उत्पादित विद्युत १३२ केभी काबेली कोरिडोर प्रसारण लाइनको अमरपुर सबस्टेसनमा जोडिनेछ ।
कम्पनीले यसअघि संखुवासभामा निर्माण गरेको ३ मेगावाटको पिलुवा जलविद्युत केन्द्र सञ्चालनमा छ । कम्पनीले यही जलविद्युत केन्द्रको विद्युत बिक्रीबाट भएको आम्दानी विभिन्न सहायक कम्पनी मार्फत अघि बढेका जलविद्युत आयोजनामा पनि लगानी गरेको छ ।
.jpg)