ऊर्जा खबर
काठमाडौँ । धादिङमा ४.७२ मेगावाटको लापखोला जलविद्युत् आयोजना निर्माण हुने भएको छ । जिल्लाको रुबी भ्याली गाँउपालिका–५ मा रहेको लापाखोलाको पानीलाई उपयोग गर्दै हार्मोनी इनिसिएटिभ्स् प्रालिले आयोजना निर्माण गर्न लागेको हो । नदी प्रवाहमा आधारित उक्त जलविद्युत् आयोजना निर्माणका लागि कम्पनीले विद्युत् विकास विभागमा आवेदन दिएको छ ।
आयोजनाबाट वार्षिक सरदर २७.३३ गिगावाट घन्टा विद्युत् उत्पादन हुनेछ । उत्पादन भएको विद्युत्लाई ३३ केभीको प्रसारण लाइन मार्फत १० किलोमिटरको दूरीमा रहेको बोराङ्ग सबस्टेशनमा जोडिने छ ।
आयोजनाको सम्पूर्ण संरचनाहरू रुबीभ्याली गाँउपालिका–५ मा अवस्थित लापाखोलाको दायाँ किनारामा रहने छ । कम्पनीले आयोजना निर्माण सुरु भएको २ वर्षभित्र सम्पन्न गर्ने लक्ष्य राखेको छ ।
प्रारम्भिक वातावरणीय प्रभाव परीक्षण (आइइई) प्रतिवेदन तयार भइसकेको आयोजनाको निर्माण गर्दा उल्लेखनीय वातावरण प्रभाव पार्ने भए ३५ दिनभित्र लिखित राय, सुझाव तथा प्रतिक्रिया पेश गर्न आग्रह गर्दै विभागले शुक्रबार सूचना जारी गरेको छ ।
.jpg)
