ऊर्जा खबर
काठमाडौं । चितवनमा बक्यौता असुली कार्यको क्रममा लाइन काट्न खटिएका नेपाल विद्युत प्राधिकरणका कर्मचारीमाथि कुटपिट भएको छ । लामो समयसम्म वा बारम्बार ताकेता गर्दा पनि महसुल नबुझाउने ग्राहकको लाइन काट्न जादाँ प्राधिकरण रत्ननगर टांडी वितरण केन्द्रका कर्मचारीमा भौतिक आक्रमण भएको हो ।
केन्द्र अन्तर्गतको शक्तिखोरमा अवस्थित सिराईचुली काष्ठ फर्निचर उद्योगले लामो समयसम्म महसुल नबुझाएपछि लाइन काट्न जाँदा सञ्चालक राज श्रेष्ठले कर्मचारीमाथि हातपात गरेको केन्द्रले जनाएको छ । केन्द्रका अनुसार प्राधिकरणको प्रचलित विनियमावली अनुसार बाँकी बक्यौता रहेको कुनै पनि ग्राहकले ६० दिनसम्म महसुल भुक्तानी नगरेमा बिना सूचना लाइन काटिने व्यवस्था बमोजिम नै कर्मचारी लाइन काट्न गएका थिए ।
सञ्चालक श्रेष्ठले कर्मचारीमाथि हातपात गरी अश्लिल शब्द प्रयोग गरी ज्यान मार्ने धम्की दिँदै केही समय बन्दक समेत गरी कर्मचारीमाथि दुर्व्यवहार गरेको केन्द्रले जनाएको छ । कर्मचारीमाथि दुर्व्यवहार गर्ने श्रेष्ठको कारबाही नभए सार्वजनिक मुद्दा चलाउने पनि केन्द्रले जनाएको छ ।
