ऊर्जा खबर
काठमाडौं । गण्डकी प्रदेश, म्याग्दी जिल्लाको अन्नपूर्ण गाउँपालिका भएर बग्ने घलेम्दी खोलामा ९.१४ मेगावाटको सुपर घलेम्दी जलविद्युत आयोजना निर्माण हुने भएको छ । सुपर घलेम्दी हाइड्रो पावर प्रालिले घलेम्दी खोलामा पहिचान भएको आयोजना अघि बढाउन लागेको हो ।
जिल्लाको अन्नपूर्ण गाउँपालिकामा पहिचान भई अध्ययन पुरा भएको आयोजना अघि बढाउन विद्युत विकास विभागमा आवेदन दिएको कम्पनीले जनाको छ । कम्पनीका अनुसार विभागबाट अनुमति पाउने लगतै आयोजना निर्माणको काम सुरु गरिनेछ ।
आयोजना निर्माण तथा सञचालन गर्दा पर्न सक्ने प्रतिकुल असरका विषयमा सरोकारवालसँग राय/सुझाव माग गरेको छ । विभागले ३५ दिने सूचना जारी गर्दै उक्त अवधिभित्र सुझाव दिन पनि माग गरेको छ ।
नदी प्रवाहमा आधारित (रन अफ रिभर) प्रकारको आयोजनाको जडित क्षमता ९.१४ मेगावाट हुनेछ । यस आयोजनाको डिजाइन बहाव २.६१ घनमिट प्रति सेकेण्ड र कुल हेड ४५८ मिटर हुने अध्ययनले देखाएको छ । आयोजनाबाट वार्षिक सरदर ५३.८५ गिगावाट घण्टा विद्युत उत्पादन हुनेछ ।
आयोजनाका भौतिक संरचनाहरु अन्नपूर्ण गाउँपालिकामा अवस्थित घलेम्दी खोलाको दायाँ किनारामा पट्टि रहनेछन् । आयोजनाको लागि आवश्यक पानी फर्काउन घलेम्दी खोलामा बाँध बाँधी खोलाकोे दायाँ पट्टि निर्माण हुने इन्टेकबाट पानी फर्काइ सो पानीलाई आयोजनाको मुख्य संरचनाहरु हुदैँ विद्युत गृहमा लगिनेछ ।
विद्युत गृहमा जडित ४.५७ मेगावाट क्षमताका २ वटा होरिजेन्ट पेल्टन टर्बाइनमा पानी खसाली सो टर्बाइनसँग जोडिएका २ वटा ५.५ एमभिए क्षमताको जेनेरेटर मार्फत विद्युत उत्पादन गरिनेछ । विद्युत उत्पादन पछि त्याहाँबाट निस्केको पानीलाई १२ मिटर लामो टेलरेस क्यानल मार्फत पूनः घलेम्दी खोलामा पठाइनेछ ।
विद्युत गृह नजिकै स्वीच्यार्ड निर्माण गरी उत्पादन हुने विद्युतलाई ५ किलोमिटर लामो ३३ केभी प्रसारण लाइन मार्फत नेपाल विद्युत प्राधिकरणको दाना सबस्टेसनमा जोडी राष्ट्रिय प्रसारण प्रणालीमा समाहित गरिनेछ ।
यो आयोजना २०८३ बैशाखसम्मा सम्पन्न गर्ने लक्ष्य लिएको छ । आयोजना निर्माण तथा सञ्चालन गर्दा भू–क्षय बाढी पहिरो, वायु प्रदुषण आदिद्वारा वातावरणमा उल्लेखनीय असर नपर्ने गरी निर्माण गरिनेछ ।
