ऊर्जा खबर
काठमाडौँ । १४० मेगावाटको तनहुँ जलविद्युत् आयोजना (माथिल्लो सेती) को निमित्त आयोजना प्रमुखमा श्यामजी भण्डारी नियुक्त भएका छन् । आयोजना प्रवर्द्धक कम्पनी तनहुँ हाइड्रोपावर लिमिटेडको सञ्चालक समितिले उनलाई २४ फागुनदेखि लागु हुने गरी उक्त पदमा नियुक्त गरेको हो ।
प्राधिकरणकाे सहायक साेही कम्पनीले अघि बढाएको १२६ मेगावाटको तल्लो सेती आयोजनाको प्रमुखको जिम्मेवारीमा रहँदै आएका भण्डारीलाई तनहुँ आयोजनाको समेत प्रमुखको जिम्मेवारी तोकिएको हो ।
यसअघि तनहुँ जलविद्युत् आयोजना प्रमुखको जिम्मेवारीमा रहेका राजभाई शिल्पकारलाई नेपाल विद्युत् प्राधिकरणको कार्यकारी निर्देशकको सचिवालयमा सरुवा गरिएपछि भण्डारीलाई निमित्त आयोजना प्रमुख नियुक्त गरिएको हो ।
२०६० सालमा ७ तहको सिभिल इन्जिनियर पदबाट प्राधिकरणको सेवा प्रवेश गरेका भण्डारी सुरुदेखि नै तनहुँ जलविद्युत् आयोजनाको अध्ययन तथा डिजाइन निर्माणमा सक्रिय थिए । जर्मनीबाट स्ट्रक्चरल इन्जिनियरिङमा स्नातकोत्तर उत्तीर्ण गरेका भण्डारीको विज्ञता खास गरी बाँध (ड्याम) निर्माणसम्बन्धी विषयमा रहेको छ ।
२०७७ सालमा प्राधिकरणको प्रबन्धक (१० तह) मा बढुवा भएका उनी तनहुँ हाइड्रोपावर लिमिटेडले निर्माण गरिरहेका कुल २६६ मेगावाटका दुई आयोजनाको नेतृत्व गर्ने महत्वपूर्ण जिम्मेवारीमा पुगेका छन् ।
.jpg)
