दिलसा भण्डारी
काठमाडौँ । एस के इनर्जी डेभलपमेन्ट लिमिटेडद्वारा भोजपुरमा निर्माणधीन ७.२ मेगावाटको श्याम खोला आंशिक जलाशय जलविद्युत् आयोजनाको ४५ प्रतिशत निर्माण कार्य सकिएको छ । कम्पनीले २०७९ साल माघ महिनादेखि उक्त जलविद्युत् आयोजनाको निर्माण सुरु गरेको थियो । जिल्लाको षडानन्द नगरपालिका भएर बग्ने उक्त खोलाको पानी सदुपयोग गर्दै कम्पनीले आयोजना निर्माण गर्न लागेको हो । आयोजनाको बाँध क्षेत्र उक्त नगरपालिकाको किमालुङमा र विद्युत्गृह खर्ताम्चा भन्ने स्थानमा निर्माण भइरहेको छ ।
आयोजनाको वेर र बालुवा थिग्राउने पोखरीको निर्माण सम्पन्न भइसकेको तथा बाँध, इन्टेक, जलाशय, फोरवे टयाङ्क, पेनस्टक, हेडरेस पाइप, टेलरेस र विद्युत्गृहको निर्माण अघि बढिरहेको प्रवर्द्धक कम्पनीका अध्यक्ष वीरबहादुर राईले ऊर्जा खबरसँग बताए ।
उनका अनुसार सर्ज ट्याङ्क निर्माणको काम भने हालसम्म सुरु हुन सकेको छैन । आयोजनाबाट उत्पादित विद्युत् १० किलोमिटर दूरीमा निर्माणाधीन शीतलपाटी सबस्टेसनमा जोडिनेछ । उक्त सबस्टेसनको निर्माण ढिलो भएकाले आयोजनाको निर्माणको गति समेत सुस्त भइरहेको उनले बताए । ‘सबस्टेसन निर्माण सक्न अझै १ वर्ष लाग्ने भएकाले आयोजना पनि उक्त सबस्टेसनसँगै निर्माण सकेर विद्युत् उत्पादन गर्ने लक्ष्य छ,’ उनले भने ।
आयोजनाको पिकिङ जलाशयबाट १ हजार ४२० मिटर लामो हेडरेस पाइपमार्फत पानीलाई फोरवे टयाङ्क हुँदै ४ हजार ४५७ मिटर लामो पेनस्टक पाइपद्वारा विद्युत्गृहमा पुर्याइनेछ । विद्युत्गृहमा जडान भएको दुई वटा टवाईनमा पानी खसाली टवाईनसँग जोडिएको जेनेरेटरमार्फत विद्युत् उत्पादन गरिने छ । दैनिक ३ घण्टा पानी भण्डारण गरी उच्च माग हुने समय (पिकिङ आवर) मा चलाउन सक्ने गरी निर्माण गर्न लागिएको आयोजनाको विद्युत्गृह अर्धभूमिगत हुनेछ ।
आयोजनाबाट वार्षिक सरदर ४२.४४८ गिगावाट घण्टा विद्युत् उत्पादन हुनेछ । आयोजनाबाट उत्पादन हुने बिजुली सबस्टेसनसम्म पुर्याइ राष्ट्रिय प्रणालीमा जोड्न आवश्यक ३३ केभीको लाइन कम्पनी आफैँले निर्माण गर्ने छ ।
कुल लागत अनुमान १५६ करोड रुपैयाँ रहेको छ । यस मध्ये ७० प्रतिशत बैंकको ऋण लगानी रहेको छ । आयोजनामा सानिमा बैंकको नेतृत्वमा अन्य बैंकहरूले समेत ऋण लगानी गरेका छन् ।
