नागढुंगा–सिस्नेखोला सुरुङमार्गको ब्रेक थ्रु, सञ्चालनमा आउन अझै एक वर्ष लाग्ने

काठमाडौं । नागढुंगा–सिस्नेखोला सुरुङको साेमबार ब्रेक थ्रु गरिएको छ । प्रधानमन्त्री पुष्पकमल दाहालको उपस्थितिमा विशेष पूजापाठसहित सुरुङ छिचोल्न बाँकी २ मिटर क्षेत्रमा ब्लाष्ट गरेर ब्रेक थ्रु गरिएको हो ।

जापान इन्टरनेशनल कोअपरेशन एजेन्सी (जाइका) को ऋण सहयोगमा उक्त सुरुङमार्ग निर्माण भएको हो । जापानको हाजमा एण्डो कर्पोरेशनले निर्माण सुरु गरेको ५३ महिनामा सुरुङ खनेर छिचोलिएको हो । कुल २ हजार ६ सय ८८ मिटर रहेको मुख्य सुरुङको निर्माण २०७६ कात्तिकमा तत्कालीन प्रधानमन्त्री केपी शर्मा ओलीले शुभारम्भ गरेका थिए ।

हाल सुरुङको ब्रेक थ्रु भए पनि त्यसमा सवारी साधन चलाउन भने अझै १ वर्ष लाग्ने बताइएको छ । आयोजनाको सुरुङभित्र र बाहिरका विभिन्न संरचनाको निर्माण पूरा गरेपछि मात्रै सवारी साधन चलाउन सकिने छ ।

सुरुङभित्रको सडक ३० सेन्टिमिटर बाक्लो ढलान गरी निर्माण गरिने छ । त्यस्तै सडकको दायाँ बाँया ढल निर्माण गरिने छ । सुरुङको चौडाइ ७ मिटरको रहेको छ ।

सुरुङको दुवैतर्फको मुखमा सुरुङमार्ग प्रयोग गरेबापटको शुल्क उठाउन शुल्क द्वार (टोल गेट) राखिने छ । त्यहाँ २४ सै घण्टा सुरक्षाकर्मी, प्रामिक चिकित्सकको टोली, एम्बुलेन्स, सुरुङमार्गसम्बन्धी प्राविधिक कर्मचारीलगायतको उपस्थिति रहेन छ ।

दुईपाङ्ग्रे सवारी साधनले भने सुरुङमार्ग प्रयोग गर्न नपाउने भएका छन् । त्यस्तै, पेट्रोल, डिजेल र ग्यास बोकेको बुलेटलाई सुरुङमार्ग प्रयोग गर्न दिइने छैन । प्रयोग गर्न पाउनेले पनि कति शुल्क तिर्नुपर्छ भन्ने अहिले निश्चित भइसकेको छैन ।