ऊर्जा खबर
काठमाडौँ । नेपाल नवीकरणीय ऊर्जा कार्यक्रमअन्तर्गतका परियोजनाहरूमा बैंकहरूले लगानी गर्ने मध्ये २० प्रतिशत ऋणकाे जाेखिम वैकल्पिक ऊर्जा प्रवर्द्धन केन्द्रले लिने भएको छ । यसका लागि केन्द्रले विभिन्न बैंकहरूसँग सम्झौता गरिरहेको छ ।
हालसम्म विभिन्न ८ वटा बैंकसँग सम्झौता भइसकेको नेपाल नवीकरणीय ऊर्जा कार्यक्रमका डेपुटी टिम लिडर प्रेमसागर सुवेदीले बताए । ‘बिहीबार मात्र हामीले सिद्धार्थ बैंकसँग सम्झौता गरेका छौँ,’ उनले भने, ‘हालसम्म विभिन्न ८ वटा बैंकसँग सम्झौता भइसकेको छ ।’
केन्द्रले हालसम्म नबिल बैंक, एनएमबी बैंक, ग्लोबल आइएमई बैंक, लक्ष्मी सनराइज बैंक, हिमालयन बैंक, मुक्तिनाथ विकास बैंकलगायत ८ वटा बैंकसँग यस्तो सम्झौता गरिसकेको र अन्य बैंकसँग पनि सम्झौता गर्ने प्रक्रिया अघि बढाइरहेको उनले बताए । सम्झौता अनुसार केन्द्रले सञ्चालन गरिरहेको दीगो ऊर्जा चुनौती कोषले बैंकले प्रवाह गर्ने ऋणको २० प्रतिशतसम्म कर्जा असुलीको जोखिम लिने छ । यसले नवीकरणीय ऊर्जा परियोजनाहरूमा लगानी गर्न बैंकलाई सहज हुने अपेक्षा गरिएको छ ।
नवीकरणीय ऊर्जा कार्यक्रमअन्तर्गत हाल देशभर सोलार विद्युत्काे नेट मिटरिङ, १ मेगावाटसम्मका ग्रिड टाइड सोलार परियोजना, फोहोरबाट ऊर्जा निकाल्ने परियोजना, मिनी र माइक्रो हाइड्रो, घरायसी विद्युतीय चुलो, सिँचाइका लागि सौर्य वाटर पम्प जस्ता परियोजनाहरू सञ्चालनमा छन् ।
विद्युतीय चुलो प्रवर्द्धन परियोजनाअन्तर्गत हाल देशका विभिन्न लघुवित्त संस्थाहरूमार्फत ७५ हजार घरधुरीमा विद्युतीय चुलो प्रणाली स्थापना गर्ने कार्यक्रम चलिरहेको उनले बताए । यी यस्ता परियोजनामा कर्जा लगानी बढाउन बैंकहरूसँग गरिएको कर्जा जोखिम न्यूनीकरणसम्बन्धी सम्झौताले महत्वपूर्ण भूमिका निर्वाह गर्ने अपेक्षा केन्द्रले गरेको छ ।
