२२ मेगावाट सेती खोलाको निर्माण ३५ प्रतिशत सकियो

काठमाडाैं । सेती हाइड्रो पावर प्रालिले कास्कीको मुसेतोडामा निर्माण गरिरहेको २२ मेगावाटको सेती खोला जलविद्युत आयोजनाको काम ३५ प्रतिशत पूरा भएको छ । आगामी दुई वर्षभित्र निर्माण पूरा गर्ने लक्ष्यका साथ काम अगाडि बढाइएको हो ।

पोखरा महानगर–३३, मुसेतोडामा निर्माणाधीन आयोजनाको हेडवक्र्स तथा हेडरेस टनेल (सुरुङ) ३१०० मिटर खन्नुपर्नेमा १२०० मिटर पूरा भएको आयोजना प्रमुख उज्जल रेग्मीले बताए । ‘हेडवर्क्स अन्तर्गत फल्ड वाल तथा सोल्प प्रोटेक्सनको काम सम्पन्न भई बालुवा थिग्राउने पोखरिको निर्माण कार्य ५० प्रतिशत सम्पन्न भएको छ,’ उनले ऊर्जा खबर भने, ‘तोकिएको समयभित्र निर्माण पूरा गर्ने लक्ष्यका साथ विद्युतगृहको काम पनि भइरहेको छ ।’

कुमारी बैंक लिमिटेडको अगुवाईमा लगानी जोहो भएको आयोजना क्यू४२ डिजाइन डिस्चार्ज गरिएको कम्पनीले जानकारी दियो । यस्तै, सिभिल निर्माणको जिम्मा एमए कन्स्ट्रक्सन प्रालिले पाएको छ भने हाइड्रो मेकानिकलको माछापुच्छ्रे मेटलले गरिरहेको छ । कम्पनीका अनुसार गेट तथा पेनस्टकको फ्रेब्रिकेसन सुरु भएको छ ।

यसैगरी, इलेक्ट्रो मेकानिकलको ठेक्का टोयर इटलीमार्फत डिजाइनको तथा फ्रेब्रिकेसन भइरहेको छ । उत्पादित विद्युत प्रवाह गर्नका लागि १.५ किलोमिटर प्रसारण लाइनको डिजाइन भइरहेको टनेल इन्चार्ज प्रकाश पौडेलले बताए । आयोजनाबाट उत्पादित विद्युत यस प्रसारण लाइनमार्फत लेखनाथ–दमौली १३२ केभीमा ‘लुप इन लुप आउट’ प्रविधिवाट जडान गरिने पनि उनले बताए छ ।

परामर्शदाता सिइसी कन्सल्ट रहेको आयोजनाबाट वार्षिक १३ करोड ३० लाख युनिट विद्युत ऊर्जा उत्पादन हुने अध्ययनले देखाएको छ ।