ऊर्जा खबर
काठमाडाैं । लमजुङ र गोरखाको सीमामा निर्माण सम्पन्न चेपेखोला साना जलविद्युत आयोजनाको ८.६३ मेगावाट विद्युत राष्ट्रिय प्रसारण प्रणालीमा जोडिएको छ । आशुतोष इनर्जी कम्पनीले निर्माण सम्पन्न गरेको आयोजनाको विद्युत मंगलबार (भदौ २८ गते) प्रणालीमा जोडिएको हो ।
सबै चरणको परीक्षण पूरा गरेर आयोजनाको विद्युत हिजोदेखि २१ किलोमिटर दुरीमा रहेको नेपाल विद्युत प्राधिकरणको किर्तिपुर सबस्टेसनमा जोडिएको कम्पनीका अध्यक्ष मोहनबिक्रम कार्कीले बताए । ‘२ साता आयोजनाको उपकरण तथा संरचनाको परिक्षण गर्न लाग्यो’, उनले ऊर्जा खबरसँग भने, ‘मंगलबारबाट आयोजनाले प्रसारण प्रणालीमा विद्युत दिन सुरु गरेको छ ।’
आयोजनाबाट परीक्षण उत्पादन भइरहेको र २ साता प्राधिकरणले परीक्षण उत्पादन गरेपछि व्यापारिक उत्पादन सुरु गरिने कार्किले बताए । २०७७ कात्तिकदेखि आयोजना स्थलमा संरचना निर्माणको काम सुरु गरिएको थियो ।
आयोजनाबाट २०७८ चैतदेखि विद्युत उत्पादन सुरु गर्ने तालिका भएपनि कोभिड–१९ महामारी र प्राधिकरणकाे लाइन निर्माणमा भएकाे ढिलाइका कारण उत्पादन समय लम्बिएको कार्कीले बताए ।
आयोजनाको काम सम्पन्न गर्न १ अर्ब ५० करोड रुपैयाँ अर्थात प्रतिमेगावाट १७ करोड ३८ लाख रुपैयाँ लागत अनुमान गरिएकाे थियाे । तर, अनुमानित भन्दा कम लागतमै आयाेजना पूरा भएकाे कार्कीले बताए । आयाेजनामा कूल लागतको ७५ प्रतिशत हुन आउने १ अर्ब १२ करोड ५० लाख रुपैयाँ एनएमबी बैंक एक्लैले लगानी गरेको छ ।
सुपर माई, सुपर माई ‘ए’, सुपर माई क्यासकेडलगायत जलविद्युत आयोजनाको सफल निर्माण गरेको समूहले चेपे खोला पनि निर्माण पूरा गरेको हो । यी ३ वटै आयोजना विद्युत प्राधिकरणले दिएको तालिकाभन्दा अगाडि नै सम्पन्न भई प्रसारण प्रणालीमा जोडिएका थिए । आयोजनाबाट वार्षिक ५१.५७ गिगावाट घन्टा (५ करोड १५ लाख ७० हजार युनिट) विद्युत उत्पादन हुनेछ ।
